​લંડન/યોર્કશાયર: બ્રિટનના યોર્કશાયર વાઇલ્ડલાઇફ પાર્ક (Yorkshire Wildlife Park) ખાતે એક અત્યંત ચોંકાવનારી અને દર્દનાક ઘટના સામે આવી છે. 24 વર્ષીય વિલિયમ ચૅપમૅન (William Chapman) નામના યુવાને ઝૂ (પ્રાણીસંગ્રહાલય)માં આવેલા 200 કિલોગ્રામ વજન ધરાવતા 'અલ્તાઈ' (Altai) નામના વાઘના પાંજરા (Enclosure) માં છલાંગ લગાવી દીધી હતી. પાંજરામાં પ્રવેશતાની સાથે જ હિંસક વાઘે તેના પર જીવલેણ હુમલો કરી દીધો હતો, જેના કારણે ગંભીર ઇજાઓ થવાથી તેનું ઘટનાસ્થળે જ મોત નીપજ્યું હતું.

​ગેમિંગની આદત અને માનસિક સ્થિતિ:

પ્રાપ્ત વિગતો અનુસાર, 24 વર્ષીય વિલિયમ ચૅપમૅન ઓનલાઇન વિડીયો ગેમિંગનો ભારે શોખીન હતો અને એવી ગેમ્સ વધુ રમતો હતો જેમાં હિંસક પશુઓ અને કાલ્પનિક દુનિયાનો સમાવેશ થતો હતો. તપાસકર્તાઓ અને નિષ્ણાતો એ આશંકા વ્યક્ત કરી રહ્યા છે કે શું તે પોતાની ગેમિંગની 'ફેન્ટસી વર્લ્ડ' (કાલ્પનિક દુનિયા)ને વાસ્તવિક જીવનમાં જીવવાનો પ્રયાસ કરી રહ્યો હતો, જેના લીધે તેણે આ ખતરનાક પગલું ભર્યું.

​ બાળ કલાકારથી માનસિક બીમારી સુધીની સફર:

વિલિયમ બાળપણમાં એક બહોળો પ્રતિભાશાળી કલાકાર હતો અને 10 વર્ષની ઉંમરે તેણે BBC અને ITV જેવી પ્રખ્યાત બ્રિટિશ પ્રોડક્શન્સમાં કામ કર્યું હતું. જોકે, પાછળથી તે 'સ્કીઝોફ્રેનિયા' (Schizophrenia), સાયકોસિસ (Psychosis) અને ઓસીડી (OCD) જેવી ગંભીર માનસિક બીમારીઓથી ઘેરાઈ ગયો હતો. ડાનકાસ્ટર (Doncaster) ખાતે તે માનસિક આરોગ્ય સેવાઓની સારવાર હેઠળ પણ હતો.

​પરિવાર અને પાડોશીઓ આઘાતમાં:

વિલિયમના પરિવારે આ દુર્ઘટના બાદ ઊંડા શોકની લાગણી વ્યક્ત કરી છે. તેના શિક્ષકો અને પાડોશીઓના જણાવ્યા મુજબ વિલિયમનો પરિવાર ખૂબ જ પ્રેમાળ અને કાળજી રાખનારો હતો. પાડોશીઓએ જણાવ્યું કે છેલ્લા કેટલાક સમયથી તેના વર્તનમાં બદલાવ આવ્યો હતો અને તે માનસિક રીતે અસ્વસ્થ જણાતો હતો.

​તપાસ અને સુરક્ષા સામે પ્રશ્નો:

ઘટના બની ત્યારે ઈમરજન્સી સેવાઓ તાત્કાલિક સ્થળ પર પહોંચી ગઈ હતી, પરંતુ વાઘના હુમલાથી વિલિયમને એટલી ગંભીર ઈજાઓ પહોંચી હતી કે તેને બચાવી શકાયો નહોતો. આ ઘટના બાદ ઝૂની સુરક્ષા વ્યવસ્થા તથા માનસિક અસ્વસ્થ વ્યક્તિઓની વિડીયો ગેમિંગની લત અને માનસિક સ્વાસ્થ્ય અંગેના મુદ્દાઓ ફરી એકવાર ચર્ચાના એરણે આવ્યા છે. સ્થાનિક પોલીસ અને તંત્ર દ્વારા આ મામલે વધુ તપાસ હાથ ધરવામાં આવી છે.