નવી દિલ્હી :   ૧૨ અને ૧૩ સપ્ટેમ્બરના રોજ યોજાનારી ૧૮મી BRICS સમિટને લઈને વિશ્વભરમાં ભારતની કૂટનીતિક ક્ષમતાના વખાણ થઈ રહ્યા છે, ત્યારે બીજી તરફ પડોશી દેશ પાકિસ્તાનમાં ભારે ખળભળાટ અને બેચેનીનો માહોલ જોવા મળી રહ્યો છે. દિલ્હીમાં રશિયાના રાષ્ટ્રપતિ વ્લાદિમીર પુતિનના આગમન અને ત્યારબાદ ચીનના રાષ્ટ્રપતિ શી જિનપિંગની હાજરીને પગલે પાકિસ્તાની રાજકીય વર્તુળો અને મીડિયામાં તીવ્ર ચર્ચાઓ જાગી છે. પાકિસ્તાને પણ BRICS નું સભ્યપદ મેળવવા માટે અરજી કરી હતી, પરંતુ આર્થિક કંગાળિયત અને વૈશ્વિક વિશ્વસનીયતાના અભાવે તેને સ્થાન મળ્યું નથી, જેના કારણે ત્યાં ભારે નિરાશા વ્યાપી છે.

દિલ્હીમાં આયોજિત આ વૈશ્વિક મહાકુંભને પગલે પાકિસ્તાનના અગ્રણી પત્રકારો અને નાગરિકો પોતપોતાના દેશની સ્થિતિ પર સવાલો ઉઠાવી રહ્યા છે. પાકિસ્તાની પત્રકાર કમર ચીમાએ એક નિવેદનમાં સ્વીકાર્યું હતું કે, ભારત જે રીતે વિદેશી રાષ્ટ્રાધ્યક્ષો અને તેમના સેંકડો અધિકારીઓ માટે ભવ્ય વ્યવસ્થા કરી રહ્યું છે, તેવું ઈન્ફ્રાસ્ટ્રક્ચર પાકિસ્તાન પાસે નથી. જો પાકિસ્તાનમાં આટલી મોટી વૈશ્વિક પરિષદ યોજાય તો મહેમાનોને રોકવા માટે ઇસ્લામાબાદમાં પૂરતી પાંચ-સિતારા હોટેલો પણ ઉપલબ્ધ નથી.

બીજી તરફ, પાકિસ્તાની પત્રકાર આરઝૂ કાઝમીએ દેશની આર્થિક નિર્ભરતા અને ચીનના દેવા અંગે મોટો કટાક્ષ કર્યો હતો. તેમણે જણાવ્યું હતું કે, પાકિસ્તાન પર ચીનનું એટલું મોટું દેવું છે કે શી જિનપિંગ સામે આવતા જ પાકિસ્તાની શાસકોએ મોં છુપાવવાની સ્થિતિ ઊભી થાય છે. તેમણે વધુમાં ઉમેર્યું કે ચીન-પાકિસ્તાન ઈકોનોમિક કોરિડોર (CPEC) પ્રોજેક્ટમાં એટલો વિલંબ થયો છે કે તેટલા સમયમાં તાજમહેલ પણ બની ગયો હોત.

પાકિસ્તાનના નાગરિકો પણ હવે એ વાત સ્વીકારી રહ્યા છે કે ચીન પર અતિશય નિર્ભરતાને કારણે દેશનું અર્થતંત્ર વધુ કંગાળ બન્યું છે. નવી દિલ્હીમાં પ્રધાનમંત્રી નરેન્દ્ર મોદીની આગેવાની હેઠળ વિશ્વના ૧૧ દેશોના વડાઓ એક જ મંચ પર એકત્રિત થઈને વૈશ્વિક વેપાર અને નવી ચલણી વ્યવસ્થા પર ચર્ચા કરી રહ્યા છે, ત્યારે પોતાને એકલા અટૂલા પડેલા જોઈને પાકિસ્તાની મીડિયામાં ભારે રોષ અને ઉશ્કેરાટ જોવા મળી રહ્યો છે.