રવિવારે જમ્મુ અને કાશ્મીરના કઠુઆ જિલ્લામાં આંતરરાષ્ટ્રીય સરહદ (IB) પર સરહદ સુરક્ષા દળ (BSF) એ પાકિસ્તાની ઘૂસણખોરીના પ્રયાસને નિષ્ફળ બનાવ્યો. પાકિસ્તાની ઘૂસણખોર ભાગી ગયો. ત્યારબાદ સુરક્ષા દળોએ સમગ્ર વિસ્તારનો કબજો લઈ લીધો છે અને સર્ચ ઓપરેશન શરૂ કર્યું છે.

    અહેવાલો અનુસાર, પાકિસ્તાની ઘૂસણખોર કઠુઆના બોબિયા વિસ્તારમાં આંતરરાષ્ટ્રીય સરહદ પાર કરીને ભારતીય પ્રદેશ તરફ આગળ વધ્યો હતો. સરહદ પર તૈનાત BSF જવાનોએ તેને ઘણી વખત ચેતવણી આપી હતી, પરંતુ તેણે ચેતવણીઓને અવગણી અને સરહદી વાડ તરફ આગળ વધવાનું ચાલુ રાખ્યું. ત્યારબાદ BSF જવાનોએ ઘૂસણખોરને રોકવા માટે બે રાઉન્ડ ફાયરિંગ કર્યું.

   ગોળીબાર થતાં જ ઘુસણખોર પાકિસ્તાન તરફ ભાગી ગયો હોવાનું જણાવવામાં આવી રહ્યું છે. આ ઘટના બાદ, સુરક્ષા દળોએ સમગ્ર વિસ્તારમાં સતર્કતા વધારી દીધી છે અને સરહદ પર દેખરેખ કડક કરી દીધી છે. અત્યાર સુધી કોઈ જાનહાનિના અહેવાલ નથી

   લગભગ બે અઠવાડિયા પહેલા, ભારતીય સેનાના સૈનિકોએ 28 જૂન, 2026 ના રોજ જમ્મુ અને કાશ્મીરના પૂંછ જિલ્લામાં નિયંત્રણ રેખા (LoC) પાર કરનાર એક પાકિસ્તાની ઘુસણખોરને પકડી પાડ્યો હતો. ઘુસણખોરની ઓળખ 31 વર્ષીય રઈસ ખાન તરીકે થઈ હતી, જે પાકિસ્તાન અધિકૃત કાશ્મીર (PoK)નો રહેવાસી હતો. ભારતીય સરહદમાં પ્રવેશ્યા પછી તરત જ ઘુસણખોરને બાલાકોટ સેક્ટરમાં અટકાયતમાં લેવામાં આવ્યો હોવાના અહેવાલ છે.