રિયાધ : સાઉદી અરેબિયા સાથે થયેલા ઐતિહાસિક 'મક્કા કરાર' બાદ પાકિસ્તાનની મુશ્કેલીઓમાં ભારે વધારો થયો છે, કારણ કે સાઉદી સામેના હુથી હુમલાઓમાં નિષ્ક્રિયતા દાખવવા બદલ તેને વૈશ્વિક સ્તરે ટીકાઓનો સામનો કરવો પડી રહ્યો છે અને બીજી તરફ હુથી બળવાખોરો દ્વારા પાકિસ્તાન પર સીધા હુમલા કરવાની ખુલ્લી ધમકી પણ આપવામાં આવી છે. ગત ૭ ઓગસ્ટના રોજ સાઉદી અરેબિયા, પાકિસ્તાન અને તુર્કી વચ્ચે થયેલા આ ત્રિપક્ષીય કરાર મુજબ કોઈપણ એક દેશ પર થયેલો હુમલો ત્રણેય દેશો પર હુમલો ગણવામાં આવશે અને નાટો મોડેલ પર બનેલા આ 'ઇસ્લામિક નાટો' સંગઠન દ્વારા તેનો સંયુક્ત બદલો લેવામાં આવશે, જેને લઈને અમેરિકાના પૂર્વ રાષ્ટ્રીય સુરક્ષા સલાહકાર જનરલ એચ.આર. મેકમાસ્ટરે પણ પાકિસ્તાનના શંકાસ્પદ ઈરાદાઓ પર સવાલો ઉઠાવ્યા છે.

સાઉદી અરેબિયાની ધરતી પર તુર્કી અને પાકિસ્તાની સૈનિકોની તૈનાતી સામે આક્રમક વલણ અપનાવતા હુથી નેતા અલ-બુખૈતીએ સ્પષ્ટ શબ્દોમાં ચેતવણી ઉચ્ચારી છે કે જો ઇસ્લામાબાદ અને અંકારા આ સંઘર્ષમાં આગળ વધશે તો તેમના પર પણ સીધા હુમલા કરવામાં આવશે, કારણ કે યમન કોઈપણ વિદેશી સૈન્ય હસ્તક્ષેપને ક્યારેય સ્વીકારશે નહીં. અગાઉ ઈરાન અને અમેરિકા વચ્ચે યુદ્ધવિરામ કરાવીને આંતરરાષ્ટ્રીય સ્તરે શાંતિ નિર્માતા તરીકે પોતાની છબી ચમકાવવાના પાકિસ્તાનના તમામ પ્રયાસો નિષ્ફળ ગયા હતા, અને હવે મક્કા કરાર દ્વારા વિદેશનીતિ ચમકાવવાનો દાવ પણ ઊંધો પડતો દેખાઈ રહ્યો છે.

પરિસ્થિતિ તે સમયે વધુ વણસી જ્યારે શનિવારે સાઉદી અરેબિયાએ સત્તાવાર પુષ્ટિ કરી કે યમનના હુથી બળવાખોરોએ તેની રાજધાની રિયાધને બેલિસ્ટિક મિસાઇલથી નિશાન બનાવવાનો ગંભીર પ્રયાસ કર્યો હતો, જે બંને પક્ષો વચ્ચે સંઘર્ષ વધ્યા પછી રિયાધ પર થયેલો પહેલો સીધો હુમલો છે. જોકે, સાઉદી ગઠબંધનની સક્રિય એર ડિફેન્સ સિસ્ટમે આ મિસાઇલને હવામાં જ અટકાવીને નિષ્ફળ બનાવી દીધી હતી, જેના કારણે રિયાધના રહેવાસીઓએ મોટા વિસ્ફોટનો અવાજ સાંભળ્યો હતો અને એરપોર્ટ નજીક ધુમાડાના ગોટા નજરે પડ્યા હતા, જો કે સદનસીબે આ ભયાનક હુમલામાં જાનહાનિ કે મોટા નુકસાનના કોઈ અહેવાલ સામે આવ્યા નથી.

ગઠબંધનના નિવેદન અનુસાર, હુથી બળવાખોરો દ્વારા માત્ર રિયાધ જ નહીં પરંતુ લાલ સમુદ્રના બંદર શહેર યાન્બુમાં આવેલી સાઉદી અરેબિયાની વિશાળ તેલ પાઇપલાઇન તથા નાગરિક માળખાને પણ નિશાન બનાવવાની નાપાક કોશિશ કરવામાં આવી હતી, તેમજ તૈફ, બૈશ અને ફરસાન શહેરોમાં પણ હુમલાના પ્રયાસો કરાયા હતા જેને સાઉદી સુરક્ષા દળોએ સમયસર નિષ્ફળ બનાવ્યા છે. ભલે હુથી બળવાખોરો દ્વારા રિયાધમાં સંવેદનશીલ લક્ષ્યો અને યાન્બુમાં અરામકોની સુવિધાઓને ધ્વસ્ત કરીને મોટા પાયે આગ લગાવવાના દાવા કરવામાં આવ્યા હોય, પરંતુ આ ઘટનાક્રમે મધ્ય પૂર્વના રાજકારણમાં પાકિસ્તાન માટે નવી સુરક્ષા ચિંતાઓ ઊભી કરી દીધી છે.