મુંબઈ : મુંબઈની જીવાદોરી સમાન લોકલ ટ્રેનમાંથી એક અત્યંત ચોંકાવનારો અને લાલબત્તી સમાન કિસ્સો સામે આવ્યો છે, જેનો વીડિયો હાલ સોશિયલ મીડિયા પર આગની જેમ વાયરલ થઈ રહ્યો છે. હાર્બર લાઈનના કુર્લા સ્ટેશન નજીક લોકલ ટ્રેનના મહિલા કોચમાં મુસાફરી કરી રહેલી મહિલાઓને અયોગ્ય રીતે હેરાન કરનાર એક યુવકને સાહસિક મુસાફરોએ રંગે હાથ ઝડપી લીધો હતો. આ ઘટના બાદ પ્રવાસીઓએ માત્ર તમાશો જોવાનું ટાળીને જાતે જ કાયદો હાથમાં લીધો અને રોમિયોને એવો પાઠ ભણાવ્યો કે જોનારા પણ દંગ રહી ગયા.

મહિલા કોચમાં અડપલાં કરનાર શખ્સને મુસાફરોએ ટીંગાટોળી કરીને પકડ્યો

વાયરલ થઈ રહેલા આ વીડિયોમાં સ્પષ્ટપણે જોઈ શકાય છે કે કેવી રીતે કેટલાક સતર્ક પ્રવાસીઓએ ભેગા મળીને તે યુવકને પકડી લીધો હતો. મુસાફરોએ યુવકને પ્લેટફોર્મ અને રેલવે બ્રિજ પર ટીંગાટોળી કરીને આરપીએફ (RPF) ચોકી તરફ ખેંચીને લઈ ગયા હતા. આ દરમિયાન યુવક પોતાની જાતને છોડાવવા માટે હાથ-પગ હલાવી રહ્યો હતો, પરંતુ ગુસ્સે ભરાયેલા પ્રવાસીઓએ તેને છોડ્યો ન હતો. આ ઘટનાનો વીડિયો વાયરલ થયા બાદ સેન્ટ્રલ રેલવેના ડિવિઝનલ રેલવે મેનેજર દ્વારા પણ આ મામીલાની ગંભીર નોંધ લેવામાં આવી છે અને આરપીએફને સઘન તપાસ કરવાના આદેશ આપવામાં આવ્યા છે.

મુંબઈગરાઓની બદલાતી માનસિકતા: હવે કોઈ મુશ્કેલીમાં હશે તો મૂકદર્શક નહીં બને જનતા

અગાઉ ટ્રેનોમાં બનતી આવી ઘટનાઓમાં લોકો માત્ર મૂકદર્શક બનીને તાલીમાર્થીઓની જેમ જોયા કરતા હતા, પરંતુ આ ઘટનાએ સાબિત કરી દીધું છે કે હવે મુંબઈગરાઓ જાગૃત થઈ ગયા છે. મહિલાઓની સુરક્ષાને સર્વોપરી ગણીને પ્રવાસીઓએ એક થઈને જે સાહસ બતાવ્યું છે તેનાથી સોશિયલ મીડિયા પર લોકો પ્રવાસીઓની પ્રશંસા કરી રહ્યા છે. આ બનાવથી એ સ્પષ્ટ સંદેશ ગયો છે કે હવે લોકલમાં મહિલાઓની છેડતી કે હેરાનગતિ કરનારાઓને કોઈ પણ સંજોગોમાં બક્ષવામાં આવશે નહીં અને સામાન્ય જનતા ખુદ તેમની મદદે આગળ આવશે.