મુંબઈ: મુંબઈના છત્રપતિ શિવાજી મહારાજ ઇન્ટરનેશનલ એરપોર્ટ (CSMIA) પર બુધવારે સવારે મુસાફરોએ ભારે હાલાકીનો સામનો કરવો પડ્યો હતો. મુંબઈથી લંડન જનારી બ્રિટીશ એરવેઝની ફ્લાઇટમાં પ્રસ્થાન પૂર્વે જ એર કન્ડીશનીંગ સિસ્ટમમાં ટેકનિકલ ખામી સર્જાતા વિમાનને ગ્રાઉન્ડેડ કરી દેવામાં આવ્યું હતું. આ ફ્લાઇટ સવારે 9:30 વાગ્યે ઉપડવાની હતી, પરંતુ એર કન્ડીશનીંગ યુનિટમાં ખામી હોવાથી સેંકડો મુસાફરોને લાંબા સમય સુધી વિમાનમાં જ બેસી રહેવું પડ્યું હતું.
કેબિનમાં ગરમીથી મુસાફરોનું હાલબેહાલ
વિમાનમાં મુસાફરો ચઢી ગયા હતા અને પ્રસ્થાનની તૈયારીઓ ચાલી રહી હતી, ત્યારે જ એર કન્ડીશનીંગ સિસ્ટમ બંધ થઈ ગઈ હતી. વિમાન ગ્રાઉન્ડેડ હોવાથી અને એસી ન ચાલતું હોવાથી કેબિનની અંદર તાપમાન સતત વધી રહ્યું હતું, જેના કારણે મુસાફરો ગૂંગળામણ અને અસ્વસ્થતા અનુભવી રહ્યા હતા. કલાકો સુધી ફસાયેલા રહેલા મુસાફરોએ આ પરિસ્થિતિ પર ભારે નારાજગી વ્યક્ત કરી હતી. ઘણા મુસાફરો માટે આ વિલંબ તેમની આગળની કનેક્ટિંગ ફ્લાઇટ્સ અને લંડનમાં નિર્ધારિત કાર્યક્રમો માટે પણ અવરોધરૂપ બન્યો હતો.
ટેકનિકલ ટીમોની મહેનત બાદ ફ્લાઇટ રવાના
ઘણા કલાકો સુધી ટેકનિકલ ટીમ દ્વારા વિમાનના આ યુનિટને રિપેર કરવાની કામગીરી ચાલી હતી. બપોર સુધી ચાલેલી આ મથામણ બાદ સમસ્યાનું નિરાકરણ લાવવામાં એન્જિનિયરોને સફળતા મળી હતી. આખરે, પાંચ કલાકના લાંબા વિલંબ બાદ બપોરે 2:00 વાગ્યે આ વિમાનને પ્રસ્થાન માટે મંજૂરી આપવામાં આવી અને તે સુરક્ષિત રીતે લંડન માટે રવાના થયું હતું.
આ ઘટનાએ ફરી એકવાર આંતરરાષ્ટ્રીય એરલાઇન્સ દ્વારા કરવામાં આવતી જાળવણી અને ઓપરેશનલ પડકારો સામે પ્રશ્નો ઉભા કર્યા છે. ફ્લાઇટ સમયસર રવાના ન થવાથી અનેક મુસાફરોનો દિવસનો કાર્યક્રમ ખોરવાઈ ગયો હતો. જોકે, એરલાઇન્સ તરફથી ખામી દૂર થયા બાદ ફ્લાઇટ સુરક્ષિત રવાના થઈ હોવાનો દાવો કરવામાં આવ્યો છે.