ઉત્તરપ્રદેશના લખનઉમાં થયેલી રૂ.64 લાખની આંગડિયા લૂંટનો ભેદ પાટણ LCB પોલીસે ઉકેલી નાખ્યો છે. પાટણ-સિદ્ધપુર હાઈવે પરથી ત્રણ આરોપીઓને UP નંબરની XUV-500 કાર સાથે ઝડપી પાડવામાં આવ્યા છે. આરોપીઓ પાસેથી રૂ.64 લાખની રોકડ સહિત કુલ રૂ.74.75 લાખનો મુદ્દામાલ જપ્ત કરવામાં આવ્યો છે. પૂછપરછમાં ઉત્તરપ્રદેશની અન્ય બે લૂંટમાં પણ તેમની સંડોવણી સામે આવી છે.

ઉત્તરપ્રદેશના લખનઉમાં આંગડિયા પેઢી સાથે સંકળાયેલી રૂ.64 લાખની લૂંટની ઘટનાનો પર્દાફાશ કરવામાં પાટણ લોકલ ક્રાઈમ બ્રાન્ચ (LCB) ને સફળતા મળી છે. આ લૂંટના ગુનામાં સંડોવાયેલા આરોપીઓ ગુજરાતમાં હોવાની બાતમીના આધારે પાટણ LCB એ તપાસ તેજ કરી હતી. બાતમીના આધારે પોલીસે પાટણ-સિદ્ધપુર હાઈવે પર વોચ ગોઠવી હતી.

પોલીસે હાઈવે પરથી ઉત્તરપ્રદેશ નંબરની XUV-500 કારમાં સવાર ત્રણ શખ્સોને ઝડપી પાડ્યા હતા. તપાસ દરમિયાન તેમની ઓળખ દવે યસ, રાજગોર પ્રજ્ઞેશ અને પટેલ જય તરીકે થઈ હતી. ત્રણેય આરોપીઓ પાટણ અને મહેસાણા જિલ્લાના રહેવાસી હોવાનું સામે આવ્યું છે. પોલીસે ત્રણેયની અટકાયત કરીને વધુ પૂછપરછ હાથ ધરી હતી.

પકડાયેલા આરોપીઓ પાસેથી પોલીસે રૂ.64 લાખની રોકડ રકમ મળી આવી હતી. આ ઉપરાંત પાંચ મોબાઈલ ફોન અને અંદાજે રૂ.10 લાખની કિંમતની XUV-500 કાર પણ કબજે કરવામાં આવી છે. આમ, પાટણ LCBએ સમગ્ર કાર્યવાહીમાં કુલ રૂ.74.75 લાખનો મુદ્દામાલ જપ્ત કર્યો છે. આંગડિયા લૂંટના ગુનામાં મળેલી રોકડ અંગે પણ તપાસ હાથ ધરવામાં આવી છે.

આરોપીઓની પૂછપરછ દરમિયાન ઉત્તરપ્રદેશમાં અગાઉ આચરવામાં આવેલી અન્ય બે લૂંટની ઘટનાઓમાં પણ તેમની સંડોવણી હોવાની કબૂલાત સામે આવી છે. આ રીતે લખનઉની રૂ.64 લાખની લૂંટ ઉપરાંત ઉત્તરપ્રદેશના વધુ બે લૂંટના ગુનાઓનો ભેદ પણ ઉકેલાયો છે. પોલીસ હવે આ ગુનાઓમાં તેમની ચોક્કસ ભૂમિકા અને અન્ય સાગરીતો અંગે તપાસ કરી રહી છે.

પાટણ LCBની આ કાર્યવાહીથી આંતરરાજ્ય લૂંટના નેટવર્કનો પર્દાફાશ થયો છે. પકડાયેલા ત્રણેય આરોપીઓ અંગે ઉત્તરપ્રદેશ પોલીસને જાણ કરવામાં આવી છે. હવે ઉત્તરપ્રદેશ પોલીસ દ્વારા નોંધાયેલા લૂંટના ગુનાઓ સાથે આરોપીઓની સંડોવણી અંગે આગળની કાયદેસરની કાર્યવાહી હાથ ધરવામાં આવશે.