નવી દિલ્હી, તા.૨૩: મહિલાઓ સામેના જાતીય અપરાધો અંગે હાઈકોર્ટ દ્વારા કરવામાં આવતી સંવેદનહીન ટિપ્પણીઓ સામે સુપ્રીમ કોર્ટે ફરી એકવાર સખત વલણ અપનાવ્યું છે. પટના હાઈકોર્ટના એક અત્યંત વિવાદાસ્પદ આદેશનું બુધવારે સુપ્રીમ કોર્ટે સ્વતઃ સંજ્ઞાન (Suo Motu Cognizance) લીધું હતું. પટના હાઈકોર્ટે પોતાના ચુકાદામાં એવું અવલોકન કર્યું હતું કે મહિલાની સલવાર ઉતારવાનો પ્રયાસ કરવો અને તેની છાતી દબાવવાના આરોપો "બળાત્કારના પ્રયાસ" (Attempt to Rape) નો ગુનો ગણાતા નથી.

સુપ્રીમ કોર્ટની કડક ટિપ્પણી: ટિપ્પણીઓ 'આપત્તિજનક'

ભારતના મુખ્ય ન્યાયાધીશ (CJI) સૂર્યકાંતના નેતૃત્વ હેઠળની ત્રણ ન્યાયાધીશોની ખંડપીઠે આ મામલે સુનાવણી હાથ ધરી હતી. સુપ્રીમ કોર્ટે સ્પષ્ટ શબ્દોમાં નોંધ્યું હતું કે પટના હાઈકોર્ટ દ્વારા કાયદાકીય વ્યાખ્યા આપતી વખતે કરાયેલી આવી ટિપ્પણીઓ અત્યંત આપત્તિજનક છે. CJI એ બિહારના એડવોકેટ જનરલને નિર્દેશ આપ્યો હતો કે આરોપીને તાત્કાલિક નોટિસ બજાવવામાં આવે, જેથી તેની રજૂઆત સાંભળ્યા બાદ હાઈકોર્ટના આ આદેશને રદ કરી શકાય.

શું હતો પટના હાઈકોર્ટનો વિવાદાસ્પદ આદેશ?

પટના હાઈકોર્ટે એવો તર્ક આપ્યો હતો કે જો કોઈ કેસમાં સ્પષ્ટ પ્રવેશ (Penetration) કે બળાત્કાર કરવાનો ચોક્કસ ઈરાદો સાબિત કરતા પુરાવા ન હોય, તો માત્ર કપડાં ખેંચવા કે છાતી દબાવવી એ બળાત્કારનો પ્રયાસ નથી. હાઈકોર્ટે તેને માત્ર IPC ની કલમ ૩૫૪ (મહિલાની લજ્જા ભંગ કરવી/છેડતી) હેઠળનો ગુનો ગણીને આરોપીની IPC ની કલમ ૩૭૬/૫૧૧ (બળાત્કારના પ્રયાસ) હેઠળની સજા રદ કરી દીધી હતી.

અલ્હાબાદ હાઈકોર્ટના કિસ્સાનું પુનરાવર્તન: વરિષ્ઠ વકીલોએ વ્યક્ત કરી ચિંતા

આ અગાઉ અલ્હાબાદ હાઈકોર્ટે પણ સગીરા સાથેના આવા જ એક કેસમાં વિવાદાસ્પદ ચુકાદો આપ્યો હતો, જેને સુપ્રીમ કોર્ટે રદ કરીને નીચલી અદાલતોને જાતીય ગુનાઓની સુનાવણી વખતે વધુ સંવેદનશીલતા દાખવવાની કડક માર્ગદર્શિકા જારી કરી હતી.

વરિષ્ઠ વકીલ શોભા ગુપ્તા અને એચ.એસ. ફૂલકાએ સુપ્રીમ કોર્ટનું ધ્યાન દોર્યું હતું કે સુપ્રીમ કોર્ટના સ્પષ્ટ આદેશો છતાં હાઈકોર્ટો દ્વારા સમાન પ્રકારના સંવેદનહીન આદેશો આપવામાં આવી રહ્યા છે, જે સમાજમાં ખોટો સંદેશો પહોંચાડે છે.