મુંબઈ  : મહારાષ્ટ્રના રાજકારણમાં ફરી એકવાર 'પવાર પાવર'નો જંગ તેજ બન્યો છે. રાષ્ટ્રવાદી કોંગ્રેસ પાર્ટી (NCP) ની અંદર બધું બરાબર નથી તે વાત ત્યારે સાબિત થઈ જ્યારે પક્ષના દિગ્ગજ નેતાઓ સુનિલ તટકરે અને પ્રફુલ્લ પટેલના નામ ચૂંટણી પંચને સોંપવામાં આવેલી પદાધિકારીઓની યાદીમાંથી ગાયબ જોવા મળ્યા. આશ્ચર્યની વાત એ છે કે, વરિષ્ઠ નેતાઓને બદલે પાર્થ પવાર અને જય પવાર જેવા યુવા નેતાઓને પ્રાથમિકતા આપવામાં આવી છે. જોકે, સુનેત્રા પવારે આને માત્ર એક "પ્રિન્ટિંગ ભૂલ" ગણાવીને ઠંડુ પાડવાનો પ્રયાસ કર્યો છે, પરંતુ રાજકીય પંડિતો માને છે કે આ ભૂલ પાછળ ઊંડી રાજકીય વ્યૂહરચના હોઈ શકે છે.

આ વિવાદમાં નવો વળાંક ત્યારે આવ્યો જ્યારે સુનિલ તટકરે અને પ્રફુલ્લ પટેલે અચાનક શરદ પવારની મુલાકાત લીધી. સત્તાવાર રીતે આ મુલાકાતને સ્વાસ્થ્યની પૂછપરછ માટેની 'સૌજન્ય મુલાકાત' ગણાવાઈ રહી છે, પરંતુ અંદરખાને એવી ચર્ચા છે કે આ વરિષ્ઠ નેતાઓ સુનેત્રા પવારના નેતૃત્વ અને નવી પેઢીના વધતા વર્ચસ્વથી નારાજ છે. બીજી તરફ, શરદ પવાર અને સુપ્રિયા સુલેએ જે રીતે તટકરે અને પટેલના નેતૃત્વના જાહેરમાં વખાણ કર્યા છે, તેણે સુનેત્રા પવારના જૂથ માટે મુશ્કેલીઓ ઉભી કરી દીધી છે. પક્ષમાં હવે વરિષ્ઠ નેતાઓ વિરુદ્ધ નવી પેઢી જેવો આંતરિક સંઘર્ષ સ્પષ્ટ દેખાઈ રહ્યો છે.

આવતીકાલનો દિવસ મહારાષ્ટ્રના ભાવિ રાજકારણ માટે અત્યંત મહત્વનો સાબિત થશે. શરદ પવારે સવારે ૧૧ વાગ્યે વાય.બી. ચૌહાણ સેન્ટર ખાતે પોતાના જૂથની એક મોટી બેઠક બોલાવી છે, જેમાં તેઓ પોતાની રાજકીય શક્તિનું પ્રદર્શન કરી શકે છે. જ્યારે સુનેત્રા પવાર જૂથે પોતાની બેઠક હાલ પૂરતી મુલતવી રાખી છે, જે દર્શાવે છે કે હાલમાં તેઓ બેકફૂટ પર છે. શું આ 'પ્રિન્ટિંગ ભૂલ' NCPમાં મોટા ભાગલા પાડશે કે પછી શરદ પવાર ફરી એકવાર તમામ નેતાઓને એક તાંતણે બાંધવામાં સફળ રહેશે, તેના પર આખા દેશની નજર છે.