વોશિંગ્ટન : મધ્ય પૂર્વમાં છેલ્લા બે મહિનાથી ચાલી રહેલા સંઘર્ષને ડામવા માટે અમેરિકા અને ઈરાન વચ્ચેની વાટાઘાટો હજુ પણ અનિશ્ચિતતાના વમળમાં છે. જોકે બંને પક્ષો દ્વારા એક મહિનાના યુદ્ધવિરામ (Cease-fire) ને ટેકો આપવામાં આવ્યો છે, પરંતુ તાજેતરમાં થયેલા હિંસક હુમલાઓએ આ શાંતિ મંત્રણાઓને ગંભીર રીતે જોખમમાં મૂકી દીધી છે. 
દરિયાઈ મોરચે અમેરિકાની મોટી કાર્યવાહી: શુક્રવારે અમેરિકી સૈન્યએ ઈરાનના બે ઓઈલ ટેન્કરો પર હુમલો કરી તેમને ઈરાની બંદર પર પહોંચતા પહેલા જ નિષ્ક્રિય કરી દીધા હતા. ઈરાની અધિકારીઓના જણાવ્યા મુજબ, અમેરિકાએ લડાઈનો અંત લાવવા, ઈરાની બંદરો પરથી નાકાબંધી હટાવવા અને તેલ-ગેસના મુખ્ય માર્ગ 'હોર્મુઝની સામુદ્રધુની' ને ફરીથી ખોલવા માટે દરખાસ્ત રજૂ કરી છે. જોકે, અમેરિકા ઈરાનના પરમાણુ કાર્યક્રમ પર કડક નિયંત્રણો લાદવા માંગે છે, જે ઈરાન સ્વીકારવા તૈયાર નથી. 
ઈરાની ઓઈલ ટર્મિનલ પાસે વિશાળ ઓઈલ સ્લીક: સેટેલાઇટ ઈમેજ દ્વારા ચોંકાવનારો ખુલાસો થયો છે કે ઈરાનના મુખ્ય ક્રૂડ ઓઈલ એક્સપોર્ટ ટર્મિનલ 'ખર્ગ આઈલેન્ડ' પાસે ૨૦ ચોરસ માઈલના વિસ્તારમાં તેલનો વિશાળ જથ્થો (Oil Slick) ફેલાયો છે. નિષ્ણાતોના મતે લગભગ ૩,૦૦૦ બેરલથી વધુ તેલ દરિયામાં વહી ગયું હોઈ શકે છે. અમેરિકી નાકાબંધી અને જૂની પાઈપલાઈનોને કારણે આ લીકેજ થયું હોવાની આશંકા છે, જે પર્યાવરણ માટે મોટો ખતરો બની શકે છે. 
બહેરીનમાં ૪૧ લોકોની ધરપકડ અને લેબેનોનમાં હુમલા: બીજી તરફ, બહેરીનના આંતરિક મંત્રાલયે ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC) સાથે જોડાયેલા હોવાની આશંકા હેઠળ ૪૧ લોકોની ધરપકડ કરી છે. ઈઝરાયેલની સેનાએ પણ છેલ્લા ૨૪ કલાકમાં લેબેનોનમાં હિઝબુલ્લાહના ૮૫ જેટલા ઠેકાણાઓ પર હુમલા કર્યા છે, જેમાં એક વરિષ્ઠ કમાન્ડરને ઠાર મારવામાં આવ્યો હોવાના અહેવાલ છે. 
ચીન પર પણ દબાણ વધારવાની ટ્રમ્પની રણનીતિ: ટ્રમ્પ પ્રશાસને ઈરાની સૈન્યને મદદ કરનાર ચીન અને હોંગકોંગની કંપનીઓ પર નવા પ્રતિબંધો લાદ્યા છે. આગામી અઠવાડિયે ચીનના રાષ્ટ્રપતિ શી જિનપિંગ સાથેની બેઠક પૂર્વે ટ્રમ્પ ઈરાનની અર્થવ્યવસ્થાને ભીંસમાં લેવા અને હોર્મુઝની સામુદ્રધુની ફરી ખુલે તે માટે દબાણ કરી રહ્યા છે.