આંતરરાષ્ટ્રીય સ્તરે વિમાની મુસાફરી અને સુરક્ષા સાથે જોડાયેલી એક અત્યંત દર્દનાક દુર્ઘટના સામે આવી છે. એરપોર્ટ પરથી હવામાં ઉડાન ભર્યાની ગણતરીની ક્ષણોમાં જ એક વિમાન અચાનક અનિયંત્રિત થઈને જમીનદોસ્ત થઈ ગયું હતું. સ્થાનિક સમય અનુસાર સોમવારે સવારે આશરે 9:30 વાગ્યે ટેકઓફ થયાના માત્ર 1 મિનિટના ગાળામાં જ આ અકસ્માત સર્જાયો હતો, જે ભારતીય સમય મુજબ રાત્રે લગભગ 9:00 વાગ્યાની આસપાસનો સમય થાય છે. જમીન સાથે અથડાતાની સાથે જ વિમાનમાં ભયંકર આગ ભભૂકી ઉઠી હતી, જેમાં સવાર બંને ક્રૂ સભ્યો જીવતા ભૂંજાઈ જતાં ભારે અરેરાટી વ્યાપી ગઈ છે.

આ બનાવ પચુકા શહેરમાં આવેલા એન્જિનિયર જુઆન ગુઇલેર્મો વિલાસાના એરપોર્ટ પર બન્યો હતો.

વિમાને રનવે પરથી સ્પીડ પકડીને આકાશ તરફ ઉડાન ભરી હતી. જોકે, હજુ તો તે નિયત ઊંચાઈ પ્રાપ્ત કરે તે પહેલાં જ આશરે 60 સેકન્ડની અંદર નીચેની તરફ ધસી આવ્યું હતું.

મેક્સિકોની ફેડરલ સિવિલ એવિએશન એજન્સી (AFAC) દ્વારા આપવામાં આવેલી સત્તાવાર માહિતી અનુસાર વિમાન રનવે 21 ના શરૂઆતના છેડાથી લગભગ 500 મીટરના અંતરે તૂટી પડ્યું હતું.

આ દુર્ઘટના પચુકાના વેન્ટા પ્રિએટા વિસ્તારમાં આવેલા અલ તેજોન્ટલ એવન્યુ પાસે થઈ હતી. આ સ્થળ એક સક્રિય કોમર્શિયલ માર્કેટ અને લશ્કરી કેમ્પસની એકદમ અડીને આવેલું હોવાથી આસપાસના લોકોમાં ભારે ભય ફેલાયો હતો.

હિડાલ્ગો રાજ્યના વહીવટી અધિકારીઓએ પુષ્ટિ કરી છે કે આ કમનસીબ વિમાનમાં માત્ર 2 લોકો જ સવાર હતા અને બંને મુખ્ય ક્રૂ મેમ્બર્સ હતા.

સ્થાનિક અહેવાલો મુજબ મૃતક પાયલટની ઓળખ મોઇસેસ ગોન્ઝાલેઝ મેલેન્ડેઝ તરીકે થઈ છે, જ્યારે કો-પાયલટનું નામ જોસ જેમે જાર્કિન રામોસ હોવાનું જાહેર કરાયું છે. બંને ક્રૂ મેમ્બર્સને બહાર નીકળવાની એક ક્ષણ પણ મળી શકી નહોતી.

વિમાન જમીન સાથે પછડાતાં જ ફ્યુઅલ ટેન્કમાં જોરદાર બ્લાસ્ટ થયો હતો અને સમગ્ર માળખું આગની જ્વાળાઓમાં લપેટાઈ ગયું હતું.

ઘટનાની જાણ થતાં જ ફાયર ફાઈટર્સ અને ઈમરજન્સી મેડિકલ સ્ટાફની ગાડીઓ કાફલા સાથે સ્થળ પર પહોંચી ગઈ હતી. ફાયર ટીમે ભારે જહેમત બાદ આગને કાબૂમાં લીધી હતી અને કાટમાળમાંથી બંને મૃતદેહોને બહાર કાઢી શબપરીક્ષણ માટે મોકલી આપ્યા હતા.

એવિએશન ઓથોરિટી દ્વારા આ ગંભીર અકસ્માત પાછળનું સચોટ કારણ જાણવા માટે ઉચ્ચ સ્તરીય તપાસના આદેશ આપવામાં આવ્યા છે.

ટેકઓફ દરમિયાન એન્જિનમાં કોઈ ખામી સર્જાઈ હતી કે પછી અચાનક ટેકનિકલ કંટ્રોલ સિસ્ટમ ફેલ થઈ ગઈ હતી તે અંગે બ્લેક બોક્સ અને એર ટ્રાફિક કંટ્રોલના રેકોર્ડિંગ્સ ચકાસવાની કામગીરી શરૂ કરી દેવાઈ છે.