નવી દિલ્હી, તા.૦૭: જો તમે વિમાનમાં મુસાફરી દરમિયાન પાવર બેંકનો છૂટથી ઉપયોગ કરતા હોવ, તો હવે તમારે સાવચેત રહેવાની જરૂર છે. ચંડીગઢ એરપોર્ટ પર હાલમાં જ એક ઇન્ડિગો ફ્લાઈટમાં લેન્ડિંગ બાદ પાવર બેંકમાં લાગેલી આગની ઘટનાએ સત્તાધીશોની ઊંઘ ઉડાડી દીધી છે. આ ઘટનામાં કેબિનમાં ધુમાડો ભરાઈ ગયો હતો અને મુસાફરોમાં નાસભાગ મચી ગઈ હતી, જેમાં છ લોકોને સામાન્ય ઈજા થઈ હતી. આ ગંભીર બાબતને ધ્યાનમાં લઈને ભારતની ઉડ્ડયન નિયામક સંસ્થા DGCA હવે પાવર બેંકના વપરાશ અંગેના વૈશ્વિક નિયમોની કડક સમીક્ષા કરી રહી છે.
DGCA ના સૂત્રોના જણાવ્યા અનુસાર, મુસાફરો પાવર બેંક સાથે રાખી શકશે કે નહીં તે અંગે હજુ કોઈ અંતિમ નિર્ણય લેવાયો નથી, પરંતુ તેના ઉપયોગ પર મોટા પ્રતિબંધો આવી શકે છે. જાન્યુઆરીમાં બહાર પાડવામાં આવેલા 'ડેન્જરસ ગુડ્સ એડવાઇઝરી સર્ક્યુલર' મુજબ, પ્લેનમાં પાવર બેંક દ્વારા ફોન ચાર્જ કરવા પર પહેલેથી જ રોક લગાવવામાં આવી છે. લિથિયમ-આયન બેટરી ગમે ત્યારે સળગી શકે તેવી અને કાબૂમાં લેવી મુશ્કેલ હોવાથી તેને સુરક્ષા માટે મોટું જોખમ માનવામાં આવે છે.
ઓવરહેડ કેબિનમાં પાવર બેંક રાખવી હવે જોખમી
નવા નિયમો મુજબ, પાવર બેંક અને ફાજલ લિથિયમ બેટરી માત્ર હેન્ડ બેગેજમાં જ લઈ જઈ શકાય છે. તેને સીટની ઉપર આવેલા સ્ટોરેજ (Overhead Bin) માં રાખવા પર પ્રતિબંધ છે, કારણ કે ત્યાં લાગેલી આગને ઝડપથી શોધી શકાતી નથી અને પ્લેનની અંદર તે ભયાનક સ્વરૂપ ધારણ કરી શકે છે. DGCA એ ચેતવણી આપી છે કે પાવર બેંક પોતે જ આગનું સ્ત્રોત બની શકે છે અને વિમાનની અંદર મોટી દુર્ઘટના સર્જી શકે છે.
દુનિયાભરમાં નિયમો કડક થયા
માત્ર ભારત જ નહીં, પરંતુ અમેરિકાની FAA અને આંતરરાષ્ટ્રીય સિવિલ એવિએશન ઓર્ગેનાઈઝેશન (ICAO) એ પણ પાવર બેંક અંગે માર્ગદર્શિકા બહાર પાડી છે. જાપાન અને દક્ષિણ કોરિયાની કેટલીક એરલાઇન્સે તો ફ્લાઇટ દરમિયાન પાવર બેંકના ઉપયોગ પર સંપૂર્ણ પ્રતિબંધ મૂકી દીધો છે. DGCA હવે એ બાબતની તપાસ કરી રહ્યું છે કે શું ભારતની એરલાઇન્સમાં પણ આવા વધારાના સુરક્ષા પગલાં લેવાની જરૂર છે કે નહીં. મુસાફરોની વધતી જતી બેટરી નિર્ભરતા વચ્ચે સુરક્ષા જાળવી રાખવી એ હવે નિયમનકારો માટે મોટો પડકાર છે.