નવી દિલ્હી : યુરોપના પાવરહાઉસ ગણાતા જર્મનીમાં જઈને ઉચ્ચ શિક્ષણ મેળવવાનું, સ્થાયી નોકરી શોધવાનું કે લાંબા ગાળાના રહેઠાણ (PR) માટે વિઝા મેળવવાનું સપનું જોતા ભારતીય યુવાનો માટે જર્મન ભાષા શીખવી એ પહેલી અને અનિવાર્ય શરત છે. જોકે, ઘણા ઉમેદવારો એ બાબતે ભારે મૂંઝવણમાં હોય છે કે તેમણે કઈ સત્તાવાર પરીક્ષા આપવી જોઈએ? જર્મન સરકાર દરેક હેતુ માટે અલગ-અલગ સર્ટિફિકેટ્સ સ્વીકારે છે. તમારી નાનકડી ભૂલ આખી પ્રક્રિયા પર પાણી ફેરવી શકે છે, તેથી વિઝા ઓથોરિટી દ્વારા માન્ય પરીક્ષાઓનું ગણિત સમજવું ખૂબ જ જરૂરી છે.

કેમ જરૂરી છે આ પરીક્ષાઓ અને શું છે તેનું મહત્વ?

જર્મન ભાષાની પરીક્ષાઓ એ વાતનો સત્તાવાર પુરાવો છે કે વિદેશી અરજદાર ત્યાંના વાતાવરણમાં સહેલાઈથી રહી, વાંચી, લખી અને વાતચીત કરી શકે છે. વિદ્યાર્થીઓ માટે તે યુનિવર્સિટીના લેક્ચર્સ સમજવા માટે જરૂરી છે, જ્યારે પ્રોફેશનલ્સ માટે તેનાથી નોકરી મળવાની તકો અનેકગણી વધી જાય છે. ખાસ કરીને જર્મન વહીવટીતંત્રમાં વાતચીત કરવી પડે તેવી નોકરીઓમાં ભાષાનું ઊંડું જ્ઞાન ખૂબ જ મહત્વ ધરાવે છે. એટલું જ નહીં, ઘણી વિઝા શ્રેણીઓમાં પ્રવેશ માટે પણ લઘુત્તમ ભાષા સ્તર પાસ કરવું કાયદેસર રીતે ફરજિયાત છે.

વૈશ્વિક સ્તરે માન્યતા પ્રાપ્ત ટોચની ૫ જર્મન પરીક્ષાઓ
 

તમારા હેતુ પ્રમાણે પસંદ કરો સાચો પરિક્ષા વિકલ્પ

• અભ્યાસ માટે (Study In Germany): જો તમારો ધ્યેય જર્મનીની પ્રતિષ્ઠિત યુનિવર્સિટીઓમાં એડમિશન મેળવવાનો છે, તો તમારે સામાન્ય રીતે B2 અથવા C1 લેવલ ક્લિયર કરવું પડશે. આ માટે 'TestDaF' અથવા 'Goethe' ઉત્તમ વિકલ્પ છે.
• નોકરી માટે (Work In Germany): જર્મન નોકરીદાતાઓ ઉમેદવાર પાસે B1 થી C1 સ્તરની અપેક્ષા રાખે છે. પ્રોફેશનલ્સ માટે ગોથે સર્ટિફિકેટ અથવા ટેલિકોમ (telc) સર્ટિફિકેટ્સ નોકરીના દરવાજા ખોલે છે.
• વિઝા અને ઇમિગ્રેશન માટે (Visa & Citizenship): જો તમે ફેમિલી રીયૂનિયન (કુટુંબના પુનઃમિલન) વિઝા પર જઈ રહ્યા હોવ તો મૂળભૂત A1 લેવલ પૂરતું છે. પરંતુ જો તમારે જર્મનીના કાયમી રહેવાસી (PR) બનવું હોય કે ત્યાંની નાગરિકતા જોઈતી હોય, તો ઓછામાં ઓછું B1 લેવલ પાસ કરવું આવશ્યક બને છે.

સફળતાનો મંત્ર: કેવી રીતે કરશો સ્માર્ટ તૈયારી?

કોઈપણ પરીક્ષા માટે રજીસ્ટ્રેશન કરાવતા પહેલાં સંબંધિત યુનિવર્સિટી કે ઈમિગ્રેશન વિભાગની સત્તાવાર ગાઈડલાઈન ચેક કરી લો. જર્મન ભાષાની પરીક્ષામાં રીડિંગ, રાઈટિંગ, લિસનિંગ અને સ્પીકિંગ એમ ચારેય મોડ્યુલ્સ પર સમાન પકડ હોવી જરૂરી છે. ઓફિશિયલ સ્ટડી મટીરિયલનો ઉપયોગ, વધુમાં વધુ મોક ટેસ્ટ આપવી અને બોલવાની નિયમિત પ્રેક્ટિસ કરવાથી આંતરરાષ્ટ્રીય સ્તરની આ પરીક્ષાઓ પ્રથમ પ્રયાસે જ પાસ કરી શકાય છે.