વડાપ્રધાન નરેન્દ્ર ભાઈ મોદીએ રોમ સ્થિત ફૂડ એન્ડ એગ્રીકલ્ચર ઓર્ગેનાઈઝેશન (FAO)ના મુખ્યાલયની મુલાકાત લઈ સંસ્થાના ડાયરેક્ટર જનરેલ ડૉ. ક્યૂ ડોંગ્યુ સાથે એક ઉચ્ચ સ્તરીય બેઠક યોજી હતી. આ મહત્વપૂર્ણ મુલાકાત અંગે સોશિયલ મીડિયા પ્લેટફોર્મ X પર માહિતી આપતાં પીએમ મોદીએ જણાવ્યું કે, બેઠક દરમિયાન કૃષિ ક્ષેત્રની પ્રગતિ અને વૈશ્વિક અન્ન સુરક્ષા જેવા મહત્વના વિષયો પર વિસ્તૃત ચર્ચા કરવામાં આવી હતી. આ સાથે જ તેમણે કૃષિ અને અન્ન સુરક્ષાના ક્ષેત્રમાં ભારત દ્વારા કરવામાં આવી રહેલા અદ્યતન પ્રયાસો અને વૈશ્વિક સ્તરે ભારતના યોગદાનને પણ FAO સમક્ષ પ્રમુખતાથી રેખાંકિત કર્યું હતું.