હરદોઈ:  વડાપ્રધાન નરેન્દ્ર મોદીએ ઉત્તર પ્રદેશના હરદોઈમાં ગંગા એક્સપ્રેસવેનું ઉદ્ઘાટન કર્યા બાદ એક વિશાળ ચૂંટણી રેલીને સંબોધતા મોટો દાવો કર્યો છે. તેમણે વિશ્વાસ વ્યક્ત કર્યો કે ભારતીય જનતા પાર્ટી પાંચ રાજ્યોની વિધાનસભા ચૂંટણીમાં વિજયની હેટ્રિક બનાવીને ઇતિહાસ રચશે. પીએમ મોદીએ ગુજરાતની સ્થાનિક ચૂંટણીઓમાં ભાજપના 85 ટકા વિજયનો ઉલ્લેખ કરી કાર્યકરોમાં જોમ ભર્યું હતું.

બંગાળમાં ચાલી રહેલા બીજા તબક્કાના મતદાન અંગે વડાપ્રધાને જણાવ્યું કે, દાયકાઓ પછી પ્રથમવાર બંગાળની જનતા ભયમુક્ત વાતાવરણમાં વોટ આપી રહી છે. સોશિયલ મીડિયા પર દેખાતી મતદારોની લાંબી કતારો લોકશાહીની મજબૂતીનું પ્રતીક છે. તેમણે બંગાળના નાગરિકોને લોકશાહીના આ ઉત્સવમાં વધુને વધુ સંખ્યામાં જોડાવા અને મતાધિકારનો ઉપયોગ કરવા અપીલ કરી હતી.

પીએમ મોદીએ ભારપૂર્વક કહ્યું કે 4 મેના રોજ જાહેર થનારા પરિણામો માત્ર ચૂંટણીના પરિણામો નહીં હોય, પરંતુ તે 'વિકસિત ભારત'ના સંકલ્પને વધુ વેગ આપશે. બિહાર અને ગુજરાતના દાખલા આપી તેમણે વિરોધ પક્ષો પર નિશાન સાધતા કહ્યું કે દેશ હવે વિકાસની રાજનીતિને પસંદ કરી રહ્યો છે. આ રેલીએ પાંચ રાજ્યોમાં ચૂંટણીના માહોલને વધુ ગરમાવી દીધો છે.