નવી દિલ્હી : વડાપ્રધાન નરેન્દ્ર મોદી અને યુક્રેનના રાષ્ટ્રપતિ વોલોદોમિર ઝેલેન્સકી વચ્ચે એક મહત્વપૂર્ણ ટેલિફોનિક વાર્તાલાપ યોજાયો હતો, જેમાં રશિયા સાથે ચાલી રહેલા સંઘર્ષને સમાપ્ત કરવાના માર્ગો પર વિસ્તૃત ચર્ચા કરવામાં આવી હતી. આ વાતચીત દરમિયાન રાષ્ટ્રપતિ ઝેલેન્સકીએ પ્રધાનમંત્રી મોદીને યુદ્ધ ભૂમિ અને ચાલુ સંઘર્ષ સંબંધિત તાજેતરના વિગતોથી માહિતગાર કર્યા હતા. વડાપ્રધાન મોદીએ સ્પષ્ટ શબ્દોમાં ભારતના દ્રઢ વલણને પુનરાવર્તિત કરતા જણાવ્યું હતું કે કોઈપણ સંઘર્ષનો આખરી ઉકેલ માત્ર સંવાદ અને રાજદ્વારી પ્રયાસો દ્વારા જ શક્ય છે.

વાર્તાલાપ દરમિયાન બંને દેશોના વડાઓએ પરસ્પર લાભ માટે વિવિધ ક્ષેત્રોમાં ભારત-યુક્રેન સહયોગને વધુ મજબૂત બનાવવાના આયોજનો પર પણ વિચાર-વિમર્શ કર્યો હતો. આ અંગે સોશિયલ મીડિયા પ્લેટફોર્મ 'X' પર માહિતી આપતાં રાષ્ટ્રપતિ ઝેલેન્સકીએ જણાવ્યું હતું કે ભારતના પ્રધાનમંત્રીએ વારંવાર - સીધા રશિયન નેતાને પણ - સ્પષ્ટ સંકેત આપ્યો છે કે હવે યુદ્ધનો અંત લાવવાનો સમય આવી ગયો છે, તેને લંબાવવાનો નહીં. તેમણે વધુમાં ઉમેર્યું હતું કે રશિયન આક્રમણથી ખોરવાયેલા કાળા સમુદ્રમાં અનાજ નિકાસ માટે કોરિડોર સ્થાપિત કરવામાં ભારત મધ્યસ્થી કરવા માટે સંપૂર્ણ તૈયાર છે.

બીજી તરફ, વડાપ્રધાન નરેન્દ્ર મોદીએ પણ 'X' પર પોસ્ટ કરીને રાષ્ટ્રપતિ ઝેલેન્સકી સાથેની આ વાતચીતને અત્યંત ઉત્પાદક ગણાવી હતી. પીએમ મોદીએ લખ્યું કે, "અમે અમારા વ્યાપક દ્વિપક્ષીય સહયોગની સમીક્ષા કરી અને ભારત-યુક્રેન સંબંધોને વધુ સુદ્રઢ બનાવવા માટે સંમતિ દર્શાવી છે. સંઘર્ષના માનવતાવાદી પાસાઓ અને શાંતિ પુનઃસ્થાપિત કરવાના પ્રયાસો પર વિચારો શેર કરવા બદલ મેં રાષ્ટ્રપતિ ઝેલેન્સકીનો આભાર માન્યો છે. આ વિસ્તારમાં શાંતિપૂર્ણ ઉકેલ લાવવા માટે શક્ય તેટલું શ્રેષ્ઠ યોગદાન આપવાનો ભારતનો નિર્ધાર અટલ છે."

વૈશ્વિક સ્તરે રશિયા અને યુક્રેન વચ્ચે લાંબા સમયથી ચાલી રહેલા યુદ્ધને કારણે વૈશ્વિક પુરવઠા શ્રૃંખલા અને ખાદ્ય સુરક્ષા પર ગંભીર અસરો પડી છે, ત્યારે ભારતની મધ્યસ્થી અને શાંતિપૂર્ણ વલણને આંતરરાષ્ટ્રીય સમુદાય ખૂબ જ મહત્વનું ગણાવી રહ્યો છે. પીએમ મોદી દ્વારા શાંતિ પુનઃસ્થાપિત કરવા માટે દર્શાવવામાં આવેલા કટિબદ્ધ વલણ બાદ હવે આગામી દિવસોમાં યુક્રેન શાંતિ વાટાઘાટોમાં ભારત કયા પ્રકારની સક્રિય રાજદ્વારી ભાન ભૂમિકા ભજવે છે તેના પર સમગ્ર વિશ્વની નજર ટકેલી રહેશે.