નવી દિલ્હી : ભારતની અધ્યક્ષતામાં નવી દિલ્હીના ભારત મંડપમ ખાતે આયોજિત ૧૮મી બ્રિક્સ સમિટ દરમિયાન વૈશ્વિક કૂટનીતિના મંચ પરથી મોટા સમાચાર સામે આવ્યા છે. વડાપ્રધાન નરેન્દ્ર મોદી અને ચીનના રાષ્ટ્રપતિ શી જિનપિંગ વચ્ચે એક અત્યંત મહત્ત્વપૂર્ણ દ્વિપક્ષીય બેઠક યોજાઈ હતી. વર્ષ ૨૦૧૯ પછી સાત વર્ષના લાંબા વિરામ બાદ ચીનના રાષ્ટ્રપતિની પ્રથમ ભારત મુલાકાત વચ્ચે યોજાયેલી આ ઉચ્ચ સ્તરીય બેઠક પર સમગ્ર વિશ્વની નજર મંડાયેલી હતી.

ભારત મંડપમ ખાતે સમિટના દ્વિતીય તબક્કામાં યોજાયેલી આ બેઠક દરમિયાન બંને દેશોના શીર્ષ નેતાઓએ દ્વિપક્ષીય સંબંધોને વધુ મજબૂત કરવા તેમજ સરહદી વિસ્તારોમાં સ્થિરતા અને શાંતિ જાળવી રાખવા અંગે ગંભીરતાથી ચર્ચા કરી હતી. પીએમ મોદીએ ભારતની બ્રિક્સ અધ્યક્ષતા દરમિયાન ચીન તરફથી મળેલા સહયોગ બદલ આભાર વ્યક્ત કર્યો હતો અને ભારપૂર્વક જણાવ્યું હતું કે, ભારત અને ચીન વચ્ચેના સ્થિર તેમજ સુમેળભર્યા સંબંધો માત્ર બંને દેશો માટે જ નહીં પરંતુ સમગ્ર વિશ્વની શાંતિ અને પ્રગતિ માટે અનિવાર્ય છે.

ચર્ચા દરમિયાન બંને નેતાઓએ સીમા મુદ્દે પ્રાપ્ત થયેલી પ્રગતિની સમીક્ષા કરી હતી અને સરહદ પર તણાવ ઓછો કરવા દ્વિપક્ષીય સંવાદ સતત ચાલુ રાખવા પર સંમતિ દર્શાવી હતી. આ ઉપરાંત વેપાર, આર્થિક ભાગીદારી, ટેકનોલોજી અને ગ્લોબલ સાઉથના મુદ્દાઓને વૈશ્વિક મંચ પર મજબૂતાઈથી રજૂ કરવા અંગે વિસ્તૃત વિચાર-વિમર્શ કરવામાં આવ્યો હતો.

આ ઐતિહાસિક વાર્તાલાપ બાદ કૂટનીતિક નિષ્ણાતો માની રહ્યા છે કે, બંને એશિયાઈ મહાસત્તાઓ વચ્ચેના આ દ્વિપક્ષીય વાર્તાલાપથી સરહદી વિસ્તારમાં વિશ્વાસનું વાતાવરણ વધુ મજબૂત બનશે અને આવનારા દિવસોમાં ભારત-ચીન સંબંધો એક નવી અને સકારાત્મક દિશામાં આગળ વધશે.