લંડન : પાકિસ્તાન કબજા હેઠળના કાશ્મીર (PoK) માં સતત વધી રહેલી હિંસા, નાગરિકો પર સુરક્ષાદળો દ્વારા કરવામાં આવી રહેલા જીવંત ગોળીબાર અને માનવાધિકારોના ગંભીર ઉલ્લંઘન સામે બ્રિટિશ સંસદમાં ભારે વિરોધનો સૂર ઊઠ્યો છે. યુકેના 50 થી વધુ સાંસદોએ બ્રિટનના વિદેશ સચિવ એડ મિલિબેન્ડને એક સંયુક્ત પત્ર લખીને PoK ની અત્યંત ગંભીર સ્થિતિ અંગે ઊંડી ચિંતા વ્યક્ત કરી છે. સાંસદોએ બ્રિટિશ સરકારને તાત્કાલિક દખલગીરી કરી પાકિસ્તાન પર દબાણ લાવવા અને રાજદ્વારી માધ્યમો દ્વારા તણાવ ઓછો કરવા વિનંતી કરી છે.

બ્રેડફોર્ડ ઇસ્ટના લેબર સાંસદ અને કાશ્મીર પરના ઓલ-પાર્ટી પાર્લામેન્ટરી ગ્રુપ (APPG) ના અધ્યક્ષ ઇમરાન હુસૈનના નેતૃત્વ હેઠળ લખાયેલા આ પત્રમાં વિભિન્ન રાજકીય પક્ષોના સાંસદોએ હસ્તાક્ષર કર્યા છે. પત્રમાં સ્પષ્ટ જણાવવામાં આવ્યું છે કે મુઝફ્ફરાબાદ અને રાવલકોટ સહિતના વિસ્તારોમાં 'સંયુક્ત આવામી કાર્યવાહી સમિતિ' (JAAC) ના વિરોધ પ્રદર્શનો દરમિયાન નિર્દોષ નાગરિકો પર બળપ્રયોગ કરવામાં આવ્યો છે, જેમાં અનેક લોકોના મોત થયા છે. ઉપરાંત, સમગ્ર પ્રદેશમાં ઇન્ટરનેટ અને સંદેશાવ્યવહાર પર નાકાબંધી લાદી દેવામાં આવી છે.

બ્રિટિશ સાંસદોએ પત્રમાં ઉઠાવેલા મુખ્ય મુદ્દા:

· બળપ્રયોગ અને હિંસા: શાંતિપૂર્ણ પ્રદર્શનકારીઓ પર ગોળીબાર અને માનવાધિકાર ભંગ અંગે સ્વતંત્ર તપાસની માંગ.

· સંદેશાવ્યવહાર પર પ્રતિબંધ: PoK માં લાદવામાં આવેલ ઈન્ટરનેટ અને બ્લેકઆઉટ તાત્કાલિક હટાવવા પાકિસ્તાન સરકાર પર દબાણ લાવવા રજૂઆત.

· બ્રિટિશ નાગરિકોની સુરક્ષા: PoK માં વસતા બ્રિટિશ નાગરિકો અને તેમના પરિવારોની સુરક્ષા તથા કોન્સ્યુલર મદદ સુનિશ્ચિત કરવા વિનંતી.

સાંસદોએ ચેતવણી આપી છે કે પાકિસ્તાની દળોની આ આક્રમક કાર્યવાહીથી પ્રદેશમાં અસ્થિરતા અને અશાંતિ વધુ વકરશે. બ્રિટનમાં રહેતા હજારો કાશ્મીરી મૂળના નાગરિકો પોતાના પરિવારજનો સાથે સંપર્ક ન થવાને કારણે ચિંતામાં મુકાયા છે. જેરેમી કોર્બિન, ડાયેન એબોટ અને ટેન ઢેસી સહિતના અગ્રણી સાંસદોએ યુકે સરકારને ભારપૂર્વક કહ્યું છે કે માનવ અધિકારોનું રક્ષણ કરીને જ આ વિવાદનો શાંતિપૂર્ણ ઉકેલ લાવી શકાય છે.