નોઇડા, તા.૧૪: નોઈડાની સડકો પર ઉતરેલા શ્રમિકોના આક્રોશ સામે આખરે તંત્રએ નમવું પડ્‍યું છે. ઉત્તર પ્રદેશની ઉચ્‍ચ સ્‍તરીય સમિતિએ એક ઐતિહાસિક નિર્ણય લેતા કામદારોના પગારમાં જંગી વધારાને લીલી ઝંડી આપી દીધી છે. આ નિર્ણય માત્ર કાગળ પર જ નહીં, પરંતુ ગ્રાઉન્‍ડ લેવલ પર ફેક્‍ટરી કામદારોના જીવનધોરણમાં મોટો સુધારો લાવશે. ખાસ કરીને નોઇડા અને ગાઝિયાબાદ જેવા ઔદ્યોગિક હબમાં અકુશળ કામદારોનો પગાર હવે સીધો રૂ.૧૩,૬૯૦ પર પહોંચી ગયો છે, જ્‍યારે કુશળ કારીગરોને હવે રૂ.૧૬,૮૬૮ મળશે. આ પગલું ઔદ્યોગિક અશાંતિને શાંત કરવા અને કામદારોના આર્થિક સુરક્ષા પૂરી પાડવા માટે લેવામાં આવ્‍યું છે.

તંત્ર દ્વારા સ્‍પષ્ટ કરવામાં આવ્‍યું છે કે નવો પગાર દર ૧ એપ્રિલથી જ અમલમાં આવી જશે. મ્‍યુનિસિપલ કોર્પોરેશન ધરાવતા મોટા શહેરોમાં પણ પગારના માળખામાં ફેરફાર કરવામાં આવ્‍યા છે, જેથી મોંઘવારીના જમાનામાં મધ્‍યમ અને શ્રમિક વર્ગને ટેકો મળી રહે. સરકારના આ આદેશ બાદ હવે તમામ ખાનગી કંપનીઓએ તેમના પે-રોલ અપડેટ કરવા પડશે. જો કોઈ કંપની નિર્ધારિત ધોરણો મુજબ પગાર ચૂકવવામાં આનાકાની કરશે, તો તેની સામે કડક કાયદાકીય કાર્યવાહી કરવાની ચીમકી પણ આપવામાં આવી છે, જેનાથી શ્રમિકોના શોષણ પર લગામ લાગશે. જોકે, આ વેતન વધારાની સાથે સરકારે સોશિયલ મીડિયા પર ચાલી રહેલી અફવાઓ પર પણ પૂર્ણવિરામ મૂકયું છે. ઈન્‍ટરનેટ પર ફેલાતા રૂ.૨૦,૦૦૦ના લઘુત્તમ વેતનના સમાચારોને સરકારે સદંતર પાયાવિહોણા ગણાવ્‍યા છે. સરકાર અત્‍યારે ભારત સરકારના નવા શ્રમ સંહિતા હેઠળ નેશનલ ફ્‌લોર વેજ પર કામ કરી રહી છે, જેનો ઉદ્દેશ્‍ય સમગ્ર દેશમાં સમાન વેતન લાગુ કરવાનો છે. હાલમાં લેવાયેલો આ નિર્ણય કામદારો અને નોકરીદાતાઓ વચ્‍ચે સંતુલન જાળવવાનો એક વ્‍યવહારિક પ્રયાસ છે, જેનાથી ઔદ્યોગિક એકમો પણ ધમધમતા રહે અને મજૂરોને પણ તેમનો હક મળે.