અલીગઢ:  ઉત્તર પ્રદેશની પ્રતિષ્ઠિત અલીગઢ મુસ્લિમ યુનિવર્સિટી (AMU) ફરી એકવાર વિવાદોના વમળમાં ફસાઈ છે. પોલીસ અને ઉત્તર પ્રદેશ એટીએસ (ATS) ના સંયુક્ત ઓપરેશન દરમિયાન હોસ્ટેલના એક રૂમમાંથી વાંધાજનક સામગ્રી મળી આવતા સમગ્ર કેમ્પસમાં હડકંપ મચી ગયો છે. આરોપી વિદ્યાર્થી શાહબાઝ પોલીસના હાથે ચઢે તે પહેલા જ ફરાર થઈ ગયો છે, જેને યુનિવર્સિટી વહીવટીતંત્રે તાત્કાલિક અસરથી સસ્પેન્ડ કરી દીધો છે.
દરોડામાં મળ્યો શસ્ત્રો અને નકલી ચલણનો જથ્થો
તપાસ એજન્સીઓએ જ્યારે શાહબાઝના રૂમમાં સર્ચ ઓપરેશન હાથ ધર્યું ત્યારે ચોંકાવનારી વિગતો સામે આવી હતી. રૂમમાંથી ૩૨ બોરની પિસ્તોલની ગોળીઓ, ૧૨ બોરના જીવંત કારતૂસ, નકલી ચલણી નોટો, ૮ મોબાઈલ ફોન, મેગેઝિન અને અનેક નકલી આઈડી કાર્ડ મળી આવ્યા છે. આટલી મોટી માત્રામાં શંકાસ્પદ વસ્તુઓ મળતા પોલીસ હવે આ મામલાને કોઈ મોટા ગુનાહિત ષડયંત્ર સાથે જોડીને જોઈ રહી છે.
ગેરકાયદેસર કબજો અને નકલી ડિગ્રીનું કૌભાંડ
ચોંકાવનારી વાત એ છે કે શાહબાઝ પાસે હોસ્ટેલના રૂમની કોઈ સત્તાવાર ફાળવણી નહોતી અને તે ત્યાં ગેરકાયદેસર રીતે રહેતો હતો. એટલું જ નહીં, તેની હાઈસ્કૂલ અને ૧૨મા ધોરણના પ્રમાણપત્રો પણ નકલી હોવાનું તપાસમાં બહાર આવ્યું છે. યુનિવર્સિટી પ્રોક્ટરે સ્પષ્ટતા કરી છે કે આ વિદ્યાર્થીએ એએમયુમાંથી ક્યારેય ૧૨મું ધોરણ પાસ કર્યું નથી.
૧૧૩ શંકાસ્પદો પર પોલીસની 'વોચ'
આ ઘટના બાદ પોલીસ અને યુનિવર્સિટી વહીવટીતંત્રે સંયુક્ત રીતે ૧૧૩ શંકાસ્પદ વ્યક્તિઓની યાદી તૈયાર કરી છે. આ તમામની ગતિવિધિઓ પર કડક નજર રાખવામાં આવી રહી છે. અલીગઢના સિવિલ લાઇન્સમાં તાજેતરમાં થયેલી ગોળીબારની ઘટના સાથે આ સામગ્રીનો કોઈ સંબંધ છે કે કેમ, તે દિશામાં પણ તપાસ તેજ કરવામાં આવી છે.
સુરક્ષામાં વધારો અને જૂનો ઇતિહાસ
એએમયુ કેમ્પસમાં ૨૬,૦૦૦ થી વધુ વિદ્યાર્થીઓ અભ્યાસ કરે છે, જેમની સુરક્ષા માટે વહીવટીતંત્રે કડક પગલાં લીધા છે. અગાઉ ૨૦૨૩માં પણ આ યુનિવર્સિટીના કેટલાક વિદ્યાર્થીઓના તાર ISIS મોડ્યુલ સાથે જોડાયેલા હોવાનું સામે આવ્યું હતું. હવે ફરી એકવાર આ પ્રકારની ગેરકાયદેસર પ્રવૃત્તિઓ સામે આવતા કેમ્પસમાં ભય અને ચિંતાનો માહોલ છે.