મુંબઈ, તા.21: મહારાષ્ટ્રના રાજકારણમાં દશેરા રેલી બાદ આરોપ-પ્રત્યારોપનો દૌર અત્યંત ઉગ્ર અને વિવાદાસ્પદ વળાંક લઈ ચૂક્યો છે. શિવસેના (ઉદ્ધવ બાળાસાહેબ ઠાકરે) જૂથના નેતા સંજય રાઉતના વિવાદાસ્પદ નિવેદન સામે પલટવાર કરતા મહારાષ્ટ્રના કેબિનેટ મંત્રી નિતેશ રાણેએ ઉદ્ધવ ઠાકરે પર આકરા પ્રહારો કર્યા છે. રાણેએ અત્યંત વિવાદાસ્પદ નિવેદન આપતા આરોપ લગાવ્યો છે કે ઉદ્ધવ ઠાકરે હાલ ગેંગસ્ટર દાઉદ ઈબ્રાહિમ જેવી ભૂમિકા ભજવી રહ્યા છે, જેના કારણે રાજ્યનું રાજકીય વાતાવરણ ગરમાઈ ગયું છે.

આ સમગ્ર રાજકીય વિવાદની શરૂઆત ઉદ્ધવ ઠાકરે જૂથની દશેરા રેલી દરમિયાન સંજય રાઉત દ્વારા આપવામાં આવેલા નિવેદનથી થઈ હતી. રાઉતે કેન્દ્રીય ગૃહ મંત્રી અમિતભાઈ શાહની સરખામણી ગેંગસ્ટર લોરેન્સ બિશ્નોઈ સાથે કરતા વિવાદાસ્પદ નિવેદન આપ્યું હતું કે, "લોરેન્સ બિશ્નોઈ છે ક્યાં? આપણા દેશના ગૃહ પ્રધાન જ અસલી લોરેન્સ બિશ્નોઈ છે." આ નિવેદન દ્વારા રાઉતે કેન્દ્ર સરકાર અને ગૃહ મંત્રી પર ગંભીર સવાલો ઉઠાવીને સત્તા પરિવર્તનની જરૂરિયાત પર ભાર મૂક્યો હતો.

સંજય રાઉતના આ પ્રહાર સામે આક્રમક મુદ્રામાં પ્રતિક્રિયા આપતા નિતેશ રાણેએ જણાવ્યું હતું કે અમિતભાઈ શાહ પર ટિપ્પણી કરતા પહેલાં સંજય રાઉતે પોતાના નેતા ઉદ્ધવ ઠાકરેની ભૂમિકા તરફ નજર નાખવી જોઈએ. રાણેએ આક્ષેપ કર્યો હતો કે ભૂતકાળમાં દાઉદ ઈબ્રાહિમ જે રીતે માફિયા તત્વો, બાંગ્લાદેશી નાગરિકો અને રોહિંગ્યાઓને આશ્રય અને પ્રોત્સાહન આપતો હતો, આજની તારીખમાં ઉદ્ધવ ઠાકરે પણ બિલકુલ તે જ રસ્તે ચાલી રહ્યા છે.

આ ઉપરાંત રાણેએ વિરોધ પક્ષો પર પ્રહાર કરતા જેએનયુના પૂર્વ વિદ્યાર્થી ઉમર ખાલિદ અને અન્ય વિવાદાસ્પદ પાત્રોનો ઉલ્લેખ કરીને ઉદ્ધવ ઠાકરે સમાન વિચારધારા ધરાવતા લોકો સાથે ભળી ગયા હોવાનો આક્ષેપ કર્યો હતો. તેમણે ફ્રાન્સ, ઈટલી, બેલ્જિયમ, બાંગ્લાદેશ અને નેપાળ જેવી આંતરરાષ્ટ્રીય ઘટનાઓનો સંદર્ભ આપીને દાવો કર્યો હતો કે ઉદ્ધવ ઠાકરે ભારતમાં પણ તેવી જ અરાજકતા અને અશાંતિ ફેલાવવા માંગે છે, પરંતુ દેશમાં તેમના આવા મનસૂબા ક્યારેય સફળ નહીં થાય.