ચેન્નઈ, તા.10: તમિલનાડુમાં આગામી વિધાનસભા પેટાચૂંટણીને લઈને રાજકીય પારો ચરમસીમાએ પહોંચ્યો છે. તમિલનાડુના મુખ્યમંત્રી અને તમિલનાડુ વેટ્રી કઝગમ (TVK) ના સ્થાપક સી. જોસેફ વિજયે ૬ ઓક્ટોબરે યોજાનારી બે વિધાનસભા બેઠકોની પેટાચૂંટણીઓ માટે પોતાના ઉમેદવારોની જાહેરાત કરી દીધી છે. ૨૩ એપ્રિલના રોજ યોજાયેલી વિધાનસભા ચૂંટણીમાં વિજય મેળવીને રાજ્યમાં પોતાની પ્રથમ સરકાર બનાવ્યા બાદ વિજયની પાર્ટી TVK માટે આ પ્રથમ મોટા રાજકીય સંગ્રામ સમાન છે, જ્યાં તેમનો સીધો મુકાબલો વિરોધ પક્ષ ડીએમકે (DMK) સાથે થશે.

પક્ષપલટો કરનારા બે પૂર્વ ધારાસભ્યોને જ TVK એ આપી ટિકિટ

ટીવીકે દ્વારા જારી કરાયેલા નિવેદન અનુસાર, AIADMK ના ભૂતપૂર્વ ધારાસભ્યો કે. મરકથમ કુમારવેલ અને પી. સત્યભામાને અનુક્રમે મદુરંતકમ અને ધારાપુરમ (અનામત) બેઠકો માટે ઉમેદવાર બનાવવામાં આવ્યા છે. ઉલ્લેખનીય છે કે, આ બંને નેતાઓએ ૨૩ એપ્રિલે AIADMK ની ટિકિટ પર જીત મેળવી હતી, પરંતુ બાદમાં ધારાસભ્ય પદેથી રાજીનામું આપીને શાસક TVK માં જોડાયા હતા. વિજયે સ્પષ્ટ કર્યું છે કે આ પેટાચૂંટણીઓ કોંગ્રેસ અને MDMK ના સમર્થન વાળા "સેક્યુલર સોશિયલ જસ્ટિસ વિક્ટરી એલાયન્સ" ના બેનર હેઠળ લડાશે. બીજી તરફ, DMK એ મદુરંતકમથી એડવોકેટ આઈ. પરંદમન અને ધારાપુરમથી એસ. સુગન્યાને મેદાનમાં ઉતાર્યા છે.

૬ ઓક્ટોબરે મતદાન અને ૯ ઓક્ટોબરે પરિણામ

ભારતના ચૂંટણી પંચના શિડ્યુલ અનુસાર, બંને બેઠકો પર ૬ ઓક્ટોબરે મતદાન થશે અને ૯ ઓક્ટોબરે મતગણતરી હાથ ધરવામાં આવશે. વિજયે પાર્ટીના કાર્યકર્તાઓને સંબોધતા જણાવ્યું હતું કે, "અમારો એકમાત્ર ઉદ્દેશ્ય વિજય હોવો જોઈએ, અને આ જીત ઐતિહાસિક રીતે મહત્વપૂર્ણ હોવી જોઈએ." આ તરફ AIADMK પણ ટૂંક સમયમાં પોતાના ઉમેદવારોની જાહેરાત કરી શકે છે, જેનાથી આ ચૂંટણી ત્રિપાંખિયા જંગમાં ફેરવાય તેવી પણ શક્યતાઓ છે.