વોશિંગ્ટન ડીસી: વ્હાઇટ હાઉસ કોરસપોન્ડન્ટ્સ ડિનર (WHCD) દરમિયાન રાષ્ટ્રપતિ ડોનાલ્ડ ટ્રમ્પ પર થયેલા કથિત હુમલાના પડઘા હજુ શમ્યા નથી ત્યાં પૂર્વ રાષ્ટ્રપતિ બરાક ઓબામાના એક નિવેદને નવો વિવાદ છેડ્યો છે. ઓબામાએ દાવો કર્યો છે કે હુમલાખોરનો ચોક્કસ હેતુ હજુ સુધી જાણી શકાયો નથી. જોકે, તેમના આ નિવેદન બાદ અમેરિકી મીડિયા અને સોશિયલ મીડિયા પર ભારે આક્રોશ જોવા મળી રહ્યો છે, કારણ કે હુમલાખોરના કબજામાંથી કથિત રીતે એક 'ટ્રમ્પ વિરોધી મેનિફેસ્ટો' (જાહેરનામું) મળી આવ્યું છે.
મેનિફેસ્ટોમાં શું છે?
અહેવાલ મુજબ, હુમલાખોરે હુમલા પહેલા સોશિયલ મીડિયા પર લાંબુ લખાણ મૂકયું હતું, જેમાં ડોનાલ્ડ ટ્રમ્પ પ્રત્યે ભારે નફરત વ્યક્ત કરવામાં આવી હતી. આ દસ્તાવેજમાં ટ્રમ્પને લોકશાહી માટે ખતરો ગણાવીને હિંસક પગલાં લેવાની હિમાયત કરવામાં આવી હતી. આટલા સ્પષ્ટ પુરાવાઓ હોવા છતાં, ઓબામા જેવા કદાવર નેતા દ્વારા 'હેતુ અજ્ઞાત' હોવાની વાત કરવામાં આવતા અનેક તર્ક-વિતર્ક સર્જાયા છે.
રાજકીય પક્ષપાતનો આરોપ
રિપબ્લિકન પાર્ટીના સમર્થકો અને અનેક રાજકીય વિશ્લેષકો આરોપ લગાવી રહ્યા છે કે ડેમોક્રેટ્સ અને પૂર્વ વહીવટીતંત્રના અધિકારીઓ હુમલાની ગંભીરતાને ઓછી બતાવવાનો પ્રયાસ કરી રહ્યા છે. વિરોધ પક્ષનું કહેવું છે કે જો હુમલાખોરે કોઈ ડેમોક્રેટ નેતા વિરુદ્ધ આવું લખાણ લખ્યું હોત, તો અત્યાર સુધી તેને આતંકવાદી જાહેર કરી દેવામાં આવ્યો હોત. પરંતુ ટ્રમ્પ વિરોધી વિચારધારાને કારણે તથ્યોને દબાવવામાં આવી રહ્યા હોવાનો ગંભીર આક્ષેપ થઈ રહ્યો છે.
તપાસ એજન્સીઓ દબાણમાં
હાલમાં એફબીઆઈ (FBI) આ મામલે તપાસ કરી રહી છે. સત્તાવાર રીતે એજન્સીએ હજુ સુધી કોઈ પણ રજૂઆત કરી નથી, પરંતુ ઓબામાના નિવેદને તપાસની દિશા પર પ્રશ્નાર્થ ચિન્હ મૂકી દીધું છે. શું હુમલાખોર માત્ર એક મનોરોગી હતો કે પછી તે કોઈ ચોક્કસ વિચારધારાથી પ્રેરિત હતો? આ સવાલનો જવાબ અત્યારે વોશિંગ્ટનના રાજકારણના કેન્દ્રમાં છે.
લોકશાહી માટે ખતરો
આ ઘટના બાદ અમેરિકામાં રાજકીય હિંસાનો ખતરો વધી ગયો છે. નિષ્ણાતોનું માનવું છે કે જ્યારે જવાબદાર નેતાઓ પુરાવા હોવા છતાં તથ્યો સ્વીકારવામાં આનાકાની કરે છે, ત્યારે સામાન્ય જનતામાં અવિશ્વાસ વધે છે. શનિવારની એ રાત્રે જે ગોળીઓ છૂટી હતી, તેણે માત્ર સુરક્ષામાં જ ગાબડું નથી પાડ્યું, પણ અમેરિકાના સામાજિક માળખામાં રહેલી મોટી ખાઈને પણ ખુલ્લી પાડી દીધી છે. આવનારા દિવસોમાં આ મામલે ટ્રમ્પ કેમ્પ દ્વારા વધુ આક્રમક વલણ અપનાવવામાં આવે તેવી પૂરેપૂરી શક્યતા છે.