લખનૌ: ઉત્તર પ્રદેશમાં કાળઝાળ ગરમી અને વધતા પારો વચ્ચે વીજળીની અછતને લઈને સર્જાયેલા હાહાકારને પગલે મુખ્યમંત્રી યોગી આદિત્યનાથ હવે સીધા એક્શન મોડમાં આવી ગયા છે. બાંદા જેવા જિલ્લાઓમાં તાપમાન ૪૮ ડિગ્રીને પાર કરી ગયું છે ત્યારે રાજ્યભરમાં વીજળી ગુલ થવાની ફરિયાદો બાદ સીએમ યોગીએ રવિવારે સવારે વીજ વિભાગના ઉચ્ચ અધિકારીઓ સાથે એક અત્યંત મહત્વપૂર્ણ બેઠક બોલાવી છે. વીડિયો કોન્ફરન્સિંગ દ્વારા યોજાનારી આ બેઠકમાં રાજ્યની વર્તમાન વીજ સ્થિતિની સમીક્ષા કરવામાં આવશે અને અધિકારીઓને કડક સૂચનાઓ આપવામાં આવશે.

સીએમ યોગીના નિર્દેશ બાદ ઉત્તર પ્રદેશ પાવર કોર્પોરેશન લિમિટેડ (UPPCL) ના અધ્યક્ષે પણ તાત્કાલિક અસરથી ગ્રામીણ વિસ્તારોમાં ૧૮ કલાક અને શહેરી વિસ્તારોમાં ૨૪ કલાક અવિરત વીજ પુરવઠો સુનિશ્ચિત કરવા આદેશ આપ્યો છે. આટલું જ નહીં, રાત્રિના સમયે જ્યારે લોડમાં અચાનક વધારો થાય છે ત્યારે ફિલ્ડમાં રહેલા અધિકારીઓને સતર્ક રહેવા અને પાવર સ્ટેશનોનું જાતે નિરીક્ષણ કરવા તાકીદ કરવામાં આવી છે.

વહીવટી તંત્રની ખાસ પહેલ:

ક્ષેત્રમાં કામ કરતા કર્મચારીઓ વીજળીના ફોલ્ટને ગણતરીની મિનિટોમાં સુધારી શકે તે માટે મધ્યાંચલ વહીવટીતંત્રે એક મોટો નિર્ણય લીધો છે. ફિલ્ડ સ્ટાફને હવે બાયોમેટ્રિક હાજરીમાંથી મુક્તિ આપવામાં આવી છે, જેથી તેઓ ૨૪ કલાકના ગાળામાં ગમે ત્યારે પોતાની હાજરી પુરાવીને જનસેવામાં પરોવાઈ શકે. આ ઉપરાંત, ૧૯૧૨ હેલ્પલાઈન નંબર પર મળતી ફરિયાદોના ત્વરિત નિકાલ માટે વરિષ્ઠ અધિકારીઓને મોડી રાત સુધી મોનિટરિંગ કરવાની જવાબદારી સોંપવામાં આવી છે.

રાજકીય ગરમાવો અને જનાક્રોશ

રાજ્યના અનેક જિલ્લાઓમાં વીજળીના કડાકાઓને કારણે જનતામાં ભારે રોષ જોવા મળી રહ્યો છે. સીતાપુરના સંદાના પાવર હાઉસ ખાતે ખેડૂતોએ રોસ્ટર મુજબ વીજળી ન મળવાને કારણે આંદોલન શરૂ કર્યું છે, તો બીજી તરફ ભાજપના જ ધારાસભ્ય નિર્મલ વર્માએ ઊર્જા મંત્રીને પત્ર લખીને ગંભીર ચિંતા વ્યક્ત કરી છે. વિપક્ષી નેતા અખિલેશ યાદવે પણ સરકારની વીજળી ઉત્પાદન ક્ષમતા વધારવાની નિષ્ફળતા પર પ્રહારો કર્યા છે. ગરમીની આ ભીષણ સ્થિતિમાં સીએમ યોગીનું આ કડક વલણ શું રાજ્યની વીજળી સ્થિતિ સુધારી શકશે? તે જોવું રહ્યું.