એમસ્ટરડેમ, તા. ૨૭: નેધરલેન્ડ્સમાં રહેતા અને ત્યાં ફરવા જવાની ઈચ્છા રાખતા ભારતીયો માટે સારા સમાચાર છે. ડચ સરકાર દેશમાં વધી રહેલા ઈંધણના ભાવ અને ઊર્જા કટોકટીનો સામનો કરવા માટે માત્ર €49 (આશરે ₹4,400) માં ત્રણ મહિના માટે 'સમર પાસ' રજૂ કરવાની તૈયારી કરી રહી છે. આ પ્રસ્તાવ મુજબ, મુસાફરો ઉનાળાના મહિનાઓ દરમિયાન ટ્રેન, બસ, ટ્રામ અને મેટ્રોમાં અમર્યાદિત મુસાફરી કરી શકશે.
શા માટે રજૂ કરાયો આ પ્રસ્તાવ?
અમેરિકા, ઇઝરાયેલ અને ઈરાન વચ્ચેના વધતા તણાવને કારણે વૈશ્વિક સ્તરે ઊર્જા સંકટ ઊભું થયું છે, જેની અસર નેધરલેન્ડ્સ પર પણ પડી છે. ઈંધણ મોંઘું થતા સામાન્ય જનતા પર બોજ વધ્યો છે. વિરોધ પક્ષ 'PRO' દ્વારા આ દરખાસ્ત મૂકવામાં આવી છે, જેનો હેતુ લોકોને ખાનગી કારના બદલે જાહેર પરિવહનનો ઉપયોગ કરવા પ્રોત્સાહિત કરવાનો છે. જો આ પાસ અમલમાં આવશે, તો મુસાફરીનો ખર્ચ ૬૦ ટકા જેટલો ઓછો થઈ જશે.
કોને મળશે ફાયદો?
આ 'નેધરલેન્ડ ટિકિટ' મુખ્યત્વે 'ઓફ-પીક' (વધુ ભીડ ન હોય તેવા સમય) માટે હશે. એટલે કે, જે લોકો રજાના દિવસોમાં પરિવારને મળવા જવા માંગતા હોય અથવા ઉનાળામાં હરવા-ફરવાના શોખીન હોય, તેમના માટે આ વરદાનરૂપ સાબિત થશે. રોજિંદા નોકરીયાત વર્ગ માટે સરકારે પહેલેથી જ ટ્રાવેલ એલાઉન્સમાં વધારો કરવાની યોજના બનાવી છે.
સરકારી તિજોરી પર બોજ
આ યોજનાને કારણે ડચ સરકાર પર અંદાજે €118 મિલિયન (આશરે ₹1,000 કરોડથી વધુ) નો આર્થિક બોજ પડશે. જોકે, વિપક્ષી નેતા જેસી ક્લેવરનું કહેવું છે કે મોંઘવારીના જમાનામાં જાહેર પરિવહનને સસ્તું અને સુલભ બનાવવું એ લોકોના ખિસ્સા માટે અને પર્યાવરણ માટે ખૂબ જ જરૂરી છે.
રાજકીય સંમતિની રાહ
નેધરલેન્ડ્સની લઘુમતી કેબિનેટને આ પ્રસ્તાવ પસાર કરવા માટે વિરોધ પક્ષોના સમર્થનની જરૂર છે. હાલમાં આ મુદ્દે સંસદમાં ચર્ચા ચાલી રહી છે. જો આ સ્કીમ મંજૂર થાય છે, તો નેધરલેન્ડ્સ પણ જર્મનીની જેમ સસ્તા ટ્રાન્સપોર્ટ પાસ આપતા દેશોની યાદીમાં સામેલ થઈ જશે. પ્રવાસીઓ માટે આ એક સુવર્ણ તક હશે કારણ કે તેઓ માત્ર એક પાસની મદદથી આખા દેશના જોવાલાયક સ્થળો ખૂબ જ ઓછા ખર્ચે જોઈ શકશે.