તેહરાન:  પશ્ચિમ એશિયાના સંઘર્ષમાં અમેરિકા અને ઇઝરાયેલના હવાઈ હુમલામાં માર્યા ગયેલા ઇરાનના સુપ્રિમ લીડર આયતોલ્લાહ સૈયદ અલી ખામેનેઇની બહુદિવસીય અંતિમ વિધિ અને દફનવિધિના કાર્યક્રમો આગામી સમયમાં યોજાવા જઈ રહ્યા છે. ઇરાનના રાષ્ટ્રપતિ મસૂદ પેઝેશ્કિયાને ભારતના વડાપ્રધાન નરેન્દ્રભાઈ મોદીને આ ભવ્ય રાજ્ય કક્ષાના અંતિમ સંસ્કારમાં હાજરી આપવા માટે સત્તાવાર અને ઔપચારિક આમંત્રણ પાઠવ્યું છે. ઉલ્લેખનીય છે કે ૨૮ ફેબ્રુઆરીના રોજ ખામેનેઇના અવસાન બાદ, ભારતના વિદેશ સચિવ વિક્રમ મિસરીએ નવી દિલ્હીમાં ઇરાની દૂતાવાસની મુલાકાત લઈને ભારત સરકાર વતી શોક પુસ્તિકામાં હસ્તાક્ષર કર્યા હતા. લાંબા સમયથી ચાલી રહેલા સંઘર્ષને કારણે વિલંબમાં પડેલી આ અંતિમ વિધિઓ હવે આગામી ૪ જુલાઈથી શરૂ થશે, જેમાં આશરે ચાર દાયકા સુધી ઇરાનનું નેતૃત્વ કરનારા મહાન નેતાને સત્તાવાર વિદાય આપવામાં આવશે.

 ભારત તરફથી પ્રતિનિધિત્વ અંગે સસ્પેન્સ, ભૂતકાળમાં જાહેર કરાયો હતો રાષ્ટ્રીય શોક:

આ ઐતિહાસિક અંતિમ સંસ્કાર સમારોહમાં ભારત સરકાર વતી કોણ પ્રતિનિધિત્વ કરશે તે અંગે હજુ સુધી કોઈ સત્તાવાર નિર્ણય જાહેર કરવામાં આવ્યો નથી. અગાઉ મે ૨૦૨૪ માં ઇરાનના તત્કાલીન રાષ્ટ્રપતિ ઇબ્રાહિમ રાયસીનું હેલિકોપ્ટર અકસ્માતમાં અવસાન થયું ત્યારે નવી દિલ્હી દ્વારા એક દિવસનો રાષ્ટ્રીય શોક જાહેર કરવામાં આવ્યો હતો અને તમામ સરકારી ઇમારતો પર રાષ્ટ્રધ્વજ અડધી કાઠીએ રાખવામાં આવ્યો હતો. તે સમયે ભારતીય પ્રતિનિધિમંડળનું નેતૃત્વ કરવા માટે ભારતના તત્કાલીન ઉપરાષ્ટ્રપતિ જગદીપ ધનખડને તેહરાન મોકલવામાં આવ્યા હતા. ભારત ઇરાનને તેના વિસ્તૃત પડોશના ભાગ તરીકે અને સાંસ્કૃતિક-સભ્યતાના સંબંધો ધરાવતા મિત્ર દેશ તરીકે જુએ છે. વડાપ્રધાન નરેન્દ્રભાઈ મોદી અને વિદેશ મંત્રી એસ જયશંકરે પશ્ચિમ એશિયાના ૪૦ દિવસના સંઘર્ષ દરમિયાન ઇરાની પક્ષો સાથે અનેક રાઉન્ડની વાતો કરી છે.

 ૫ શહેરોમાંથી પસાર થશે અંતિમ યાત્રા, લાખો લોકો જોડાશે:

અધિકારીઓના જણાવ્યા અનુસાર, ૪ જુલાઈના રોજ તેહરાનના ગ્રાન્ડ મોસાલ્લા સંકુલમાં પાર્થિવ દેહને અંતિમ દર્શન માટે રાખવામાં આવશે. ત્યારબાદ તેહરાન અને કોમ (Qom) શહેરોમાં જાહેર સરઘસો કાઢવામાં આવશે. આ પછી ઇરાકના પવિત્ર શહેરો નજફ અને કરબલામાં વિશેષ પ્રાર્થનાઓ યોજાશે. અંતે ૯ જુલાઈના રોજ ખામેનેઇના વતન મશહાદમાં આવેલા પ્રખ્યાત ઇમામ રેઝા શ્રાઇન ખાતે દફનવિધિ સંપન્ન કરવામાં આવશે. આ અભૂતપૂર્વ કાર્યક્રમમાં લાખોની સંખ્યામાં લોકો ઉમટી પડે તેવી શક્યતા છે.

 નાજુક યુદ્ધવિરામ વચ્ચે રાજદ્વારી સંબંધો વેગવંતા બન્યા:

પશ્ચિમ એશિયામાં પ્રવર્તતા નાજુક યુદ્ધવિરામ વચ્ચે રાજદ્વારી ગતિવિધિઓ તેજ બની છે. ઇરાનના વિદેશ મંત્રી અબ્બાસ અરાગચી તાજેતરમાં બ્રિક્સ (BRICS) વિદેશ મંત્રીઓની બેઠકમાં ભાગ લેવા નવી દિલ્હી આવ્યા હતા, જ્યાં તેમણે ભારતના વિદેશ મંત્રી એસ જયશંકર સાથે દ્વિપક્ષીય મંત્રણા કરી હતી. આ મુલાકાત દરમિયાન વિદેશ મંત્રી અરાગચીએ વડાપ્રધાન નરેન્દ્રભાઈ મોદી સાથે પણ મુલાકાત કરી હતી. નવી દિલ્હી દ્વારા આયોજિત બ્રિક્સની વિવિધ બેઠકોમાં ભાગ લેવા માટે તાજેતરના મહિનાઓમાં વરિષ્ઠ ઇરાની અધિકારીઓએ ભારતની અનેક મુલાકાતો લીધી છે. આ અંતિમ સંસ્કાર માટે ઇરાન દ્વારા પાડોશી દેશો પર વિશેષ ભાર મૂકીને વિશ્વના અગ્રણી દેશોને આમંત્રણ મોકલવામાં આવ્યું છે, જેમાં ઇરાક, પાકિસ્તાન, અફઘાનિસ્તાન, સીરિયા, લેબેનાન, રશિયા, ચીન અને મધ્ય એશિયાના કેટલાક દેશોએ પોતાના પ્રતિનિધિઓ મોકલવાની પુષ્ટિ કરી છે.