બેંગલુરુ, તા.૧૩: વડાપ્રધાન નરેન્દ્રભાઈ મોદીએ શુક્રવારે બેંગલુરુ ખાતે આયોજિત ભવ્ય સમારોહમાં રૂ. ૧૫,૬૦૦ કરોડથી વધુના વિકાસ પ્રોજેક્ટ્સનો શુભારંભ કરાવતા બેંગલુરુ મેટ્રોની અત્યાધુનિક 'પિંક લાઇન'ને લીલી ઝંડી આપીને જનતાને અર્પણ કરી હતી.

આ લોકાર્પણ સમારોહ દરમિયાન વડાપ્રધાને રાજ્યના અગ્રણી નેતાઓ સાથે મેટ્રોમાં મુસાફરી કરીને મુસાફરો માટે ઉપલબ્ધ આધુનિક સુવિધાઓનું નિરીક્ષણ કર્યું હતું અને આ પ્રોજેક્ટથી શહેરી પરિવહનને મળનારી ગતિ અંગે પ્રસન્નતા વ્યક્ત કરી હતી.

આ વિશાળ વિકાસ પેકેજ અંતર્ગત કર્ણાટકમાં અમૃત ભારત સ્ટેશન યોજના હેઠળ ચામરાજનગર, ચિક્કમગલુરુ, સકલેશપુર અને સુબ્રહ્મણ્ય રોડ સહિતના ચાર પુનર્વિકસિત રેલવે સ્ટેશનોનું આધુનિકીકરણ કરીને તેને લોકાર્પણ કરવામાં આવ્યા છે.

રેલવે ક્ષેત્રે કનેક્ટિવિટી વધારવા માટે બાગલકોટ અને વંડલ વચ્ચેના ૪૫ કિમી લાંબા રેલવે ડબલિંગ સેક્શનને રાષ્ટ્રને સમર્પિત કરવામાં આવ્યો છે, જે મોટા ગદગ-હોટગી પ્રોજેક્ટનો મહત્વનો ભાગ છે.

આ ઉપરાંત, ૫૫ કિમી લાંબા સકલેશપુર-સુબ્રહ્મણ્ય રોડ ઘાટ રેલવે સેક્શનના વિદ્યુતીકરણનું પણ લોકાર્પણ કરાયું છે, જેનાથી સમગ્ર બેંગલુરુ-મંગલુરુ રેલવે માર્ગ હવે સંપૂર્ણપણે વિદ્યુતીકૃત થઈ ગયો છે.

સરકારના આ મહત્વપૂર્ણ પ્રોજેક્ટ્સથી માલસામાન અને મુસાફરોની અવરજવર અત્યંત સરળ બનશે તેમજ સ્થાનિક વેપાર, પ્રવાસન અને ઉદ્યોગોને વેગ મળવાની સાથે નાગરિકોના જીવનધોરણમાં મોટો સુધારો થશે.