નવી દિલ્હી : વડાપ્રધાન નરેન્દ્રભાઈ મોદીએ રવિવારે વરિષ્ઠ ભાજપ નેતા લાલકૃષ્ણ આડવાણીના સોમા વર્ષમાં પ્રવેશ અવસરે ભારતના રાજકારણમાં તેમના અજોડ પ્રદાનને યાદ કરતો એક વિશેષ લેખ લખ્યો છે. સોશિયલ મીડિયા પર આ લેખ શેર કરતા વડાપ્રધાન નરેન્દ્રભાઈ મોદીએ લખ્યું કે 1947માં વિભાજનની ભયાનક પીડા સહન કર્યા પછી પણ આડવાણીજીએ કડવાશ વગર પોતાના જીવનને ફરીથી બેઠું કર્યું અને રાષ્ટ્રનિર્માણમાં પોતાનું જીવન સમર્પિત કરી દીધું. આ વિશેષ સ્વભાવે જ તેમને જનસંઘને મજબૂત કરવા અને ભારતીય જનતા પાર્ટીની સ્થાપનામાં મહત્ત્વપૂર્ણ ભૂમિકા ભજવવાની પ્રેરણા આપી.

વડાપ્રધાન નરેન્દ્રભાઈ મોદીએ પોતાના લેખમાં અતલ બિહારી વાજપેયી અને લાલકૃષ્ણ આડવાણીના અદ્ભુત સમન્વયને યાદ કરતા જણાવ્યું કે આ બંને દિગ્ગજ નેતાઓએ દાયકાઓ સુધી એકબીજાના સ્પર્ધક બન્યા વગર સહયોગ કરીને ભારતીય રાજકારણનો પ્રવાહ બદલી નાખ્યો. આડવાણીના નેતૃત્વમાં ભાજપ દેશની સૌથી મોટી પાર્ટી તરીકે ઉભરી આવી. તેમણે હંમેશાં રાષ્ટ્ર પ્રથમના સિદ્ધાંતને પ્રાથમિકતા આપી અને કાર્યકર્તાઓની પેઢીઓને સાચી દિશા આપી. કટોકટીના કાળા દિવસોમાં લોકશાહીના રક્ષણ માટે તેમણે જે સાહસ બતાવ્યું તે ભારતીય ઈતિહાસમાં હંમેશાં સ્વર્ણિમ અક્ષરે લખાશે.

આડવાણીજીની સંસદીય સફરનો ઉલ્લેખ કરતા વડાપ્રધાને જણાવ્યું કે દિલ્હી મહાનગર પરિષદના અધ્યક્ષથી લઈને સંસદના બંને સદનોમાં વિરોધ પક્ષના નેતા અને દેશના ગૃહમંત્રી તેમજ ઉપપ્રધાનમંત્રી તરીકે તેમણે પોતાની જવાબદારીઓ ઉત્કૃષ્ટ રીતે અદા કરી. વર્ષ 1991ની સામાન્ય ચૂંટણીઓ દરમિયાન ગાંધીનગર બેઠક પરથી આડવાણીજીની ઉમેદવારી અને ચૂંટણી પ્રચારમાં પોતે આપેલા સહયોગને યાદ કરતા વડાપ્રધાન નરેન્દ્રભાઈ મોદીએ તે ક્ષણોને અત્યંત યાદગાર ગણાવી. સોમનાથથી અયોધ્યા સુધીની ઐતિહાસિક રથયાત્રાના આયોજન અને તેના વ્યાપક પ્રભાવ વિશે વાત કરતા તેમણે કહ્યું કે આ યાત્રાએ ભારતીય સમાજની ચેતનાને જગાડવાનું કામ કર્યું.

આડવાણીજીના અંગત જીવન અને શોખ વિશે લખતા વડાપ્રધાને જણાવ્યું કે તેઓ પુસ્તકોના શોખીન, ઉત્સાહિત વાચક, પ્રખર લેખક અને સિનેમા તથા કળાના મોટા પ્રશંસક છે. સિંધ અને ભારતની સંસ્કૃતિ સાથે તેમનો નાતો હંમેશાં અતૂટ રહ્યો છે. તેમના આ સમગ્ર જાહેર જીવનમાં તેમની પત્ની સ્વર્ગસ્થ કમલા આડવાણીજી હંમેશાં તેમનો સૌથી મોટો શક્તિ સ્ત્રોત બની રહ્યા. આડવાણીજીની સાદગી અને વિચારોની સ્પષ્ટતા એવા ગુણો છે જે તેમને અન્ય રાજકીય નેતાઓથી અલગ તારવે છે.

કરાચીમાં 8 નવેમ્બર 1927ના રોજન્મેલા લાલકૃષ્ણ આડવાણીએ યુવાવસ્થામાં જ રાષ્ટ્રીય સ્વયંસેવક સંઘની દીક્ષા લીધી હતી અને જીવનના અંતિમ શ્વાસ સુધી રાષ્ટ્રસેવાને જ સર્વોપરી માની. દેશના સર્વોચ્ચ નાગરિક સન્માન ભારત રત્નથી સન્માનિત આડવાણીજીનું જીવન આવનારી પેઢીઓ માટે હંમેશાં પ્રેરણારૂપ રહેશે. તેમના શતાબ્દી વર્ષમાં સમગ્ર રાષ્ટ્ર તેમને નમન કરે છે અને તેમના ઉત્તમ સ્વાસ્થ્યની કામના કરે છે.