વારાણસી, તા. ૨૯ એપ્રિલ: પોતાના સંસદીય મતવિસ્તાર વારાણસીની બે દિવસીય મુલાકાતે આવેલા વડાપ્રધાન નરેન્દ્રભાઈ મોદીએ બુધવારે સવારે ૧૪ કિલોમીટર લાંબો ભવ્ય રોડ-શો યોજીને કાશીની જનતાનું અભિવાદન ઝીલ્યું હતું. બનારસ લોકોમોટિવ વર્ક્સ (BLW) થી શરૂ થયેલો આ રોડ-શો લહરતારા, કચેરી, આંબેડકર ચોરાહા, ચૌકાઘાટ, તેલિયાબાગ અને લહૂરાબીર જેવા વિસ્તારોમાંથી પસાર થઈને કાશી વિશ્વનાથ ધામ ખાતે સંપન્ન થયો હતો. આ સમગ્ર માર્ગ પર વડાપ્રધાનની એક ઝલક મેળવવા માટે લાખોની સંખ્યામાં લોકો ઉમટી પડ્યા હતા.

રોડ-શો બાદ વડાપ્રધાન નરેન્દ્રભાઈ મોદીએ કાશી વિશ્વનાથ મંદિરમાં વૈદિક મંત્રોચ્ચાર વચ્ચે વિધિવત પૂજા અને અનુષ્ઠાન કર્યું હતું. પૂજા પૂર્ણ થયા બાદ સ્થાનિક પ્રતિનિધિઓ દ્વારા તેમને પરંપરાગત ખેસ, ત્રિશૂળ અને ડમરુ ભેટમાં આપીને આવકારવામાં આવ્યા હતા. વડાપ્રધાને સોશિયલ મીડિયા પ્લેટફોર્મ X પર પોસ્ટ કરતા જણાવ્યું હતું કે, "હર હર મહાદેવ! કાશીમાં બાબા વિશ્વનાથના દર્શન અને પૂજા કરવાનું સૌભાગ્ય મળ્યું. મેં ભગવાન ભોલેનાથ પાસે દેશના તમામ નાગરિકોના સુખ, સમૃદ્ધિ અને સ્વસ્થ જીવન માટે પ્રાર્થના કરી છે. મા અન્નપૂર્ણા અને મા ગંગાના દર્શનથી અપાર શાંતિ મળી છે."

સમગ્ર રોડ-શો દરમિયાન ભાજપના કાર્યકરો અને સ્થાનિક રહીશોએ વિવિધ સ્થળોએ સ્વાગત પોઈન્ટ્સ ઉભા કર્યા હતા, જ્યાં ગુલાબની પાંખડીઓ, ઢોલ-નગારા અને શંખનાદથી વડાપ્રધાનનું ઉષ્માભર્યું સ્વાગત કરવામાં આવ્યું હતું. મંદિરમાંથી બહાર આવતી વખતે ભક્તોએ 'હર હર મહાદેવ' અને 'જય શ્રી રામ'ના નારા લગાવ્યા હતા, જેનો વડાપ્રધાને હાથ જોડીને અને અભિવાદન ઝીલીને પ્રતિસાદ આપ્યો હતો. તેમણે કાશી વિશ્વનાથ કોરિડોર ખાતે હાજર બાળકો સાથે પણ ટૂંકી વાતચીત કરી હતી.

ભાજપના મીડિયા ઈન્ચાર્જ અરવિંદ મિશ્રાએ આ રોડ-શોને શહેરના ઈતિહાસનો સૌથી મોટો રોડ-શો ગણાવ્યો હતો. વારાણસીની મુલાકાત પૂર્ણ કર્યા બાદ વડાપ્રધાન નરેન્દ્રભાઈ મોદી ઉત્તર પ્રદેશમાં ગંગા એક્સપ્રેસવેનું ઉદ્ઘાટન કરવા માટે રવાના થયા હતા. આ મુલાકાતે ફરી એકવાર કાશી અને વડાપ્રધાન વચ્ચેના અતૂટ સંબંધોની સાબિતી આપી છે.