નવી દિલ્હી : ભારતીય રાજકારણમાં જ્યારે બે નેતાઓ વચ્ચે શાબ્દિક યુદ્ધ થાય ત્યારે તે નવાઈની વાત નથી, પરંતુ જ્યારે અંગત વોટ્સએપ સંદેશાઓ જાહેરમાં આવે ત્યારે તે ચર્ચાનો વિષય બની જાય છે. તૃણમૂલ કોંગ્રેસ (TMC) ના સસ્પેન્ડ કરાયેલા પ્રવક્તા રિજુ દત્તા અને ભાજપના આક્રમક નેતા શહેઝાદ પૂનાવાલા વચ્ચે સોશિયલ મીડિયા પર અત્યારે આવી જ એક 'વોટ્સએપ વોર' છેડાઈ છે. ફેબ્રુઆરી ૨૦૨૬ માં જ્યારે શહેઝાદની માતાની સર્જરી થવાની હતી, ત્યારે બંને વચ્ચે થયેલી વાતચીતના સ્ક્રીનશોટ રિજુ દત્તાએ શેર કરી દીધા છે.

જ્યારે વિરોધી માટે પ્રાર્થનાઓ મોકલાઈ હતી

વાયરલ થયેલી ચેટ્સમાં જોવા મળે છે કે ૪ ફેબ્રુઆરી, ૨૦૨૬ ના રોજ શહેઝાદે રિજુને તેની માતાના અકસ્માત અને સર્જરી વિશે જાણ કરી હતી. તે સમયે રિજુએ પૂનાવાલાને "ભાઈ" કહીને મજબૂત રહેવા જણાવ્યું હતું અને તેમની માતાના સ્વાસ્થ્ય માટે પ્રાર્થના કરવાની ખાતરી આપી હતી. રિજુ દત્તાનો દાવો છે કે રાજકીય હરીફાઈ હોવા છતાં તેમણે હંમેશા વ્યક્તિગત સૌજન્ય જાળવી રાખ્યું હતું, પરંતુ હવે શહેઝાદ તેમને ખોટી રીતે ટાર્ગેટ અને ટ્રોલ કરી રહ્યા છે.

'હું ભાજપમાં નથી જવાનો પણ...'

રિજુ દત્તાએ આ પોસ્ટ સાથે સ્પષ્ટતા કરી છે કે તેમને ભાજપમાં જોડાવા માટે કોઈ ઓફર મળી નથી કે તેમણે કોઈને અપીલ કરી નથી. જોકે, તેમણે સ્વીકાર્યું હતું કે મુશ્કેલ સમયમાં જ્યારે તેમને પરિવાર અને આજીવિકાની ચિંતા હતી, ત્યારે કેટલાક ભાજપ નેતાઓએ તેમને મદદ કરી હતી. રિજુએ એ પણ જાહેરાત કરી કે તેઓ આગામી ૬ મહિના સુધી સક્રિય રાજકારણથી દૂર રહેશે.

શહેઝાદ પૂનાવાલાનો વળતો પ્રહાર

શહેઝાદ પૂનાવાલાએ આ મામલે મૌન તોડતા દત્તાના સૌજન્યનો સ્વીકાર તો કર્યો, પણ સાથે જ એક નવો પડકાર ફેંક્યો. શહેઝાદે કહ્યું કે, "તમારા સૌજન્યની ના નથી, પણ હિંમત હોય તો તે સ્ક્રીનશોટ શેર કરો જ્યાં IPAC એ તમને અમિત માલવિયા કે સુવેન્દુ અધિકારી વિરુદ્ધ અભદ્ર ટિપ્પણી કરવાના નિર્દેશ આપ્યા હતા." શહેઝાદનો આરોપ છે કે રિજુએ અગાઉ ભાજપ નેતાઓ અને હિન્દુ સમુદાય વિશે જે પણ ખરાબ બોલ્યું હતું તે બધું TMC અને IPAC ના ઈશારે કરવામાં આવ્યું હતું.

સોશિયલ મીડિયા પ્લેટફોર્મ X પર આ બંને નેતાઓ વચ્ચેનો આ વિખવાદ અત્યારે ટોક ઓફ ધ ટાઉન બન્યો છે. રાજકીય વિશ્લેષકો માને છે કે અંગત ચેટ્સ જાહેર થવાથી હવે નેતાઓ વચ્ચેના વિશ્વાસ પર વધુ અસર પડશે.