પુણે : મહારાષ્ટ્રના પુણે શહેરમાં સનસનાટી મચાવનારા કેતન અગ્રવાલ હત્યા કેસમાં દરરોજ ચોંકાવનારા ખુલાસા થઈ રહ્યા છે. આ હાઈ-પ્રોફાઈલ કેસની મુખ્ય આરોપી સિયા ગોયલના પિતા પ્રવીણ ગોયલને અચાનક હૃદય સંબંધિત ગંભીર તબીબી કટોકટી (હાર્ટ એટેક) આવ્યા બાદ હોસ્પિટલમાં દાખલ કરવામાં આવ્યા છે. અહેવાલો અનુસાર, છાતીમાં અસહ્ય દુખાવાની ફરિયાદ બાદ તેમને તાત્કાલિક પુણેની પ્રખ્યાત રૂબી હોલ ક્લિનિકમાં લઈ જવામાં આવ્યા હતા, જ્યાં તેમની ગંભીર સ્થિતિને જોતા ઇન્ટેન્સિવ કેર યુનિટ (ICU) માં રાખવામાં આવ્યા છે. પરિવારના સભ્યોના જણાવ્યા મુજબ, દીકરીની હત્યા કેસમાં ધરપકડ અને પોલીસ તપાસના અતિશય તણાવના કારણે તેમની આ હાલત થઈ છે. આ ઘટનાને પગલે પોલીસે હોસ્પિટલના આઈસીયુ વોર્ડની આસપાસ સુરક્ષા ચુસ્ત કરી દીધી છે.

તપાસમાં ત્રીજા શંકાસ્પદની એન્ટ્રીથી પોલીસ પણ ચોંકી

બીજી તરફ, કેતન અગ્રવાલના રહસ્યમય મૃત્યુની તપાસ કરી રહેલી પોલીસને એક મોટી સફળતા મળી છે. પોલીસે આ કેસમાં કાવતરાનો પર્દાફાશ કરવા માટે હવે ત્રીજા શંકાસ્પદ વ્યક્તિની અટકાયત કરી છે. આ કેસના અન્ય એક સહ-આરોપી ચેતન ચૌધરીના મિત્ર નીરજ ચૌધરીની પોલીસે કડક પૂછપરછ શરૂ કરી છે. પોલીસ એ જાણવાનો પ્રયાસ કરી રહી છે કે ૧૮ જૂનના રોજ લોહાગઢ કિલ્લા પર થયેલી આ ઘાતકી હત્યાના દિવસે અને તે પહેલાં નીરજની શું ભૂમિકા હતી.

મોબાઈલ ફોનની અદલાબદલીનું રહસ્ય

તપાસકર્તાઓના સત્તાવાર દાવા મુજબ, હત્યાના દિવસે આરોપી ચેતન ચૌધરી હોશિયારી વાપરીને પોતાનો અંગત મોબાઈલ ફોન પાછળ છોડી ગયો હતો અને લોહાગઢ કિલ્લા તરફ જતી વખતે પોતાના મિત્ર નીરજનો ફોન સાથે લઈ ગયો હતો. પોલીસને પાકો સરેહદ છે કે મુખ્ય આરોપી સિયા ગોયલ અને ચેતન ચૌધરી લોકેશન ટ્રેસ ન થાય તે માટે આ 'ડમી' ફોન દ્વારા સતત એકબીજાના સંપર્કમાં રહ્યા હતા.

અકસ્માત નહીં, ઠંડા કલેજે ઘડાયેલું કાવતરું

ઉલ્લેખનીય છે કે, શરૂઆતમાં કેતન અગ્રવાલના મોતને સામાન્ય અકસ્માત માનીને કેસ રફેદફે કરવાનો પ્રયાસ કરાયો હતો, પરંતુ ઝીણવટભરી તપાસ બાદ આ મામલો ઠંડા કલેજે કરાયેલી ક્રૂર હત્યાનો હોવાનું બહાર આવ્યું છે. પોલીસના જણાવ્યા અનુસાર, સિયા અને ચેતને કેતનની હત્યા કરવા માટે અગાઉ પણ કેટલાક નિષ્ફળ પ્રયાસો કર્યા હતા. હાલમાં પોલીસ ઘટનાસ્થળની આસપાસના સીસીટીવી (CCTV) ફૂટેજ અને બંને આરોપીઓના કોલ ડિટેઈલ રેકોર્ડ્સ (CDR) ની ઉંડાણપૂર્વક તપાસ કરી રહી છે, જેમાં ઘટનાના મહિનાઓ પહેલાંથી બંને વચ્ચે કલાકો સુધી શંકાસ્પદ વાતો થતી હોવાના મજબૂત પુરાવા મળ્યા છે.