ચંદીગઢ : દેશભરમાં ઇ-૨૦ પેટ્રોલ નીતિને લઈને રાજકીય વિરોધ અને ચર્ચાઓ જોર પકડી રહી છે, ત્યારે પંજાબના ખેડૂતોએ ખુલ્લેઆમ આ નીતિના સમર્થનમાં આગળ આવીને મકાઈ અને શેરડીની વધતી માંગ તથા સારી કિંમતના કારણે આ નીતિ તેમના માટે વધારાની આવકનો મોટો સ્ત્રોત બની હોવાનું જણાવ્યું છે.

આમ આદમી પાર્ટીના રાષ્ટ્રીય કન્વીનર અરવિંદ કેજરીવાલે જૂના વાહનોના એન્જિન અને માઇલેજને લઈને ઇ-૨૦ ઇંધણ સામે ચિંતા વ્યક્ત કરી હતી, પરંતુ તેની સામે પંજાબના ખેડૂત સંગઠનો અને માઝા ઝોન અર્થિયા એસોસિએશનના પ્રમુખ નરેન્દ્ર ભેલ તથા અન્ય ખેડૂતોએ પરંપરાગત ઘઉં-ડાંગરના પાક ચક્રને બદલીને મકાઈની ખેતી તરફ વળવાનું વલણ દાખવ્યું છે અને આ નીતિથી ખેડૂતોને યોગ્ય બજાર ભાવ મળી રહ્યા હોવાનું સ્પષ્ટ કર્યું છે.

કેન્દ્ર સરકારના જણાવ્યા અનુસાર ઇથેનોલ મિશ્રણ કાર્યક્રમ માત્ર ખેડૂતો માટે નવું બજાર ઊભું કરતો નથી પરંતુ દેશની ક્રૂડ ઓઇલ પરની નિર્ભરતા ઘટાડવામાં પણ મદદરૂપ છે, જેથી પંજાબના ખેડૂતોએ રાજકીય વિવાદોથી ઉપર ઉઠીને આ નીતિને અવિરત ચાલુ રાખવા માટે ભારપૂર્વક અપીલ કરી છે.

આ અગાઉ પણ દેશમાં હરિયાળી ક્રાંતિ અને વિવિધ કૃષિ સુધારાઓને લઈને નીતિગત ચર્ચાઓ થતી રહી છે, ત્યારે વર્તમાન પરિસ્થિતિમાં ઇથેનોલ ઉત્પાદનને મળેલા વેગને કારણે ખેડૂતોના આર્થિક હિતો સુરક્ષિત રહે તે માટે સરકાર આગામી સમયમાં કેવા નીતિગત નિર્ણયો લે છે તેના પર સૌની નજર ટકેલી છે.