તરનતારન: પંજાબ પોલીસની એન્ટી-ગેંગસ્ટર ટાસ્ક ફોર્સે વિદેશી ધરતી પરથી ગુનેગારોને પાછા લાવવાની દિશામાં ઐતિહાસિક સફળતા મેળવી છે. કેન્દ્રીય ગુપ્તચર એજન્સીઓ, કાઉન્ટર ઇન્ટેલિજન્સ પંજાબ અને ઓવરસીઝ ફ્યુજિટિવ ટ્રેકિંગ એન્ડ ઇવેક્યુએશન સેલ (OFTEC) દ્વારા ચલાવવામાં આવેલા વિશેષ ‘ઓપરેશન શહીદ’ હેઠળ કુખ્યાત ગેંગસ્ટર ગુરવિંદર સિંહ ઉર્ફે આફ્રિદી ટુટને ઇથોપિયાથી ભારતમાં સફળતાપૂર્વક પ્રત્યાર્પિત કરવામાં આવ્યો છે. રૂ. ૫ લાખનું ઇનામ ધરાવતો આફ્રિદી વિદેશમાં બેસીને પંજાબમાં ગુનાહિત સામ્રાજ્ય ચલાવી રહ્યો હતો.
વિદેશમાં છુપાયેલા ગેંગસ્ટર લખબીર સિંહ હરિકે અને પ્રભુ દાસુવાલના અત્યંત નજીકના સાથીદાર ગણાતા આફ્રિદી ટુટ સામે ૫૦થી વધુ ખંડણી અને હત્યાના ગંભીર કેસો નોંધાયેલા છે. તરનતારન જિલ્લાના ટુટ ગામનો વતની આફ્રિદી પંજાબ અને આસપાસના વિસ્તારોમાં આતંકનો પર્યાય બની ચૂક્યો હતો. તેણે બ્લોક કોંગ્રેસ પટ્ટીના પ્રમુખ ગુરમેલ સિંહ ટુટની સનસનાટીભરી હત્યા સહિત અનેક મોટા ગુનાઓનું કાવતરું રચ્યું હતું અને સ્થાનિક વેપારીઓ તથા નેતાઓ પાસેથી અસંખ્ય ખંડણીઓ ઉઘરાવી હતી.
આ આંતરરાષ્ટ્રીય ઓપરેશન પાર પાડવા માટે ભારતીય એજન્સીઓએ એશિયા, દક્ષિણ અમેરિકા અને આફ્રિકા ખંડના વિવિધ સ્થળોએથી ચોક્કસ ગુપ્ત માહિતી એકત્રિત કરી હતી. લાંબા સમય સુધી આફ્રિદીની દરેક હિલચાલ પર સતત નજર રાખ્યા બાદ, યોગ્ય તક મળતાં જ તેની અટકાયત કરીને ભારત લાવવાની પ્રક્રિયા પૂર્ણ કરવામાં આવી છે. આ સફળતાથી સરહદી જિલ્લા તરનતારનમાં સક્રિય ગેંગસ્ટરો અને તેમના આંતરરાષ્ટ્રીય નેટવર્કને મોટો આંચકો લાગ્યો છે.
આ અગાઉ, કેનેડામાં આશ્રય લઈ રહેલા તરનતારનના મિયાવિંડ ગામના વતની અને ૨૧ જેટલા હત્યા તેમજ અન્ય ગુનામાં સંડોવાયેલા ગેંગસ્ટર અમૃતપાલ સિંહ બાથની પણ અટકાયત કરવામાં આવી હતી, જેને ભારત લાવવાના પ્રયાસો અંતિમ તબક્કામાં છે. હાલમાં ભારતમાં લાવવામાં આવેલા આફ્રિદી ટુટની સઘન પૂછપરછ હાથ ધરવામાં આવશે, જેનાથી પંજાબમાં વિદેશી ફંડિંગ અને ગેંગસ્ટર-આતંકવાદી ગઠબંધનની નવી વિગતો બહાર આવવાની પૂરી શક્યતા છે.