મુંબઈ, તા.૧૯: આર્થિક નગરી મુંબઈના પશ્ચિમ ઉપનગર બાંદ્રામાં આવેલા ગરીબ નગર વિસ્તારમાં આજે વહેલી સવારથી જ ભારે હલચલ જોવા મળી રહી છે. બોમ્બે હાઈકોર્ટે પશ્ચિમ રેલ્વે (WR) ને રેલ્વેની જમીન પરના અનધિકૃત બાંધકામો દૂર કરવાની મંજૂરી આપ્યાના ગણતરીના દિવસોમાં જ, આજે મંગળવાર ૧૯ મેથી અહીં પાંચ દિવસની વિશાળ ડિમોલિશન ઝુંબેશનો પ્રારંભ કરી દેવાયો છે. આ અતિક્રમણ વિરોધી મોટું અભિયાન આગામી ૨૩ મે સુધી સતત ચાલુ રહેશે. રેલ્વે પ્રશાસન, સ્થાનિક મહાનગરપાલિકા અને પોલીસ એજન્સીઓના સંયુક્ત સંકલન સાથે સમગ્ર ઓપરેશન હાથ ધરવામાં આવી રહ્યું છે.

આ કાર્યવાહી કાયદો અને વ્યવસ્થાની સ્થિતિ વણસે નહીં તે માટે ભારે સાવચેતી વચ્ચે કરવામાં આવી રહી છે. અગાઉ ગરીબ નગર રાહીવાસી કલ્યાણ સંઘ સોસાયટી દ્વારા હાઈકોર્ટમાં અરજી કરીને આક્ષેપ કરાયો હતો કે, પુનર્વસન માટે લાયક જાહેર કરાયેલા પરિવારોના ઘરો પણ તોડી પાડવામાં આવ્યા છે, જેના કારણે રહેવાસીઓને ભારે માનસિક અને શારીરિક મુશ્કેલીઓનો સામનો કરવો પડ્યો છે. જો કે, બોમ્બે હાઈકોર્ટે ૫ મેના રોજ આપેલા પોતાના આદેશમાં સ્પષ્ટ કર્યું હતું કે રેલ્વે પોતાની જમીન ખાલી કરાવવા માટે ડિમોલિશન ચાલુ રાખી શકે છે, પરંતુ ઓગસ્ટ ૨૦૨૧ના સર્વેક્ષણ મુજબ જે રહેવાસીઓ લાયક (Eligible) ઠર્યા છે, તેમના બંધારણીય અધિકારો અને આશ્રયનું રક્ષણ થવું અનિવાર્ય છે.

૪૦૦ સુરક્ષાકર્મીઓ તૈનાત, ફાયર બ્રિગેડ અને એમ્બ્યુલન્સ સ્ટેન્ડબાય

બાંદ્રાના આ સંવેદનશીલ વિસ્તારમાં ડિમોલિશન દરમિયાન કોઈ અનિચ્છનીય ઘટના કે હોબાળો ન થાય તે માટે લોખંડી પોલીસ બંદોબસ્ત ગોઠવવામાં આવ્યો છે. મુંબઈ પોલીસ, રેલ્વે પ્રોટેક્શન ફોર્સ (RPF) અને ગવર્નમેન્ટ રેલ્વે પોલીસ (GRP) ના આશરે ૪૦૦ જેટલા સશસ્ત્ર જવાનો ઘટનાસ્થળે તૈનાત છે. કોઈપણ કટોકટીની સ્થિતિને પહોંચી વળવા માટે ફાયર બ્રિગેડની ટીમો, એમ્બ્યુલન્સ અને લોખંડી બેરિકેડ્સની વ્યવસ્થા અગાઉથી જ કરી દેવામાં આવી છે.

રાજકીય ગરમાવો અને પુનર્વસનનો પ્લાન

આ ડિમોલિશન સાઇટ પર પહોંચેલા ભાજપના વરિષ્ઠ નેતા કિરીટ સોમૈયાએ બાંદ્રા ટર્મિનસ નજીકથી 'બાંગ્લાદેશી' ઘૂસણખોરોના અતિક્રમણો હટાવવા બદલ રેલ્વે અને મુંબઈ પોલીસની કામગીરીને બિરદાવી હતી અને આભાર માન્યો હતો. બીજી તરફ, રેલ્વેના વકીલ આયુષ કેડિયાએ કોર્ટને ખાતરી આપી છે કે પ્રક્રિયામાં અસરગ્રસ્ત થતા લાયક પરિવારોનું MMRDA દ્વારા 'મુંબઈ વન પ્રોજેક્ટ' હેઠળ યોગ્ય પુનર્વસન કરવામાં આવશે, જે પશ્ચિમ રેલ્વેની લાઇન-૬ ના વિકાસ સાથે જોડાયેલું છે.