ન્યૂ યોર્ક, તા.26: અમેરિકાના સૌથી ઉદારવાદી ગણાતા મહાનગર ન્યૂ યોર્ક સિટીના રાજકારણમાં એક મોટો ભૂકંપ આવ્યો છે, જેને વિશ્લેષકોએ લોહિયાળ સિરીઝ 'ગેમ ઓફ થ્રોન્સ' ના પ્રખ્યાત 'રેડ વેડિંગ' (મોટા પાયે થયેલા રાજકીય નરસંહાર) સાથે સરખાવ્યો છે. તાજેતરમાં યોજાયેલી પ્રાઇમરી ચૂંટણીમાં ન્યૂ યોર્કના મેયર ઝોહરાન મામદાનીના કટ્ટરપંથી સમાજવાદી જૂથ અને 'ડેમોક્રેટિક સોશિયાલિસ્ટ્સ ઓફ અમેરિકા' (DSA) એ પરંપરાગત અને સ્થાપિત ડેમોક્રેટિક નેતાઓનો સફાયો કરીને પાર્ટી પર પ્રતિકૂળ કબજો (Hostile Takeover) જમાવવાનું શરૂ કરી દીધું છે. આશ્ચર્યની વાત એ છે કે આ આખી ક્રાંતિ માત્ર 7 થી 17 ટકા જેટલા અત્યંત ઓછા સક્રિય મતદારોના મતદાનથી જ શક્ય બની છે.

પાંચ ટર્મના અનુભવી નેતા એસ્પાયલેટ ધૂળ ચાટતા થયા

આ ચૂંટણીનો સૌથી મોટો સનસનાટીભર્યો ઉલટફેર 13મા હાઉસ ડિસ્ટ્રિક્ટમાં જોવા મળ્યો હતો. અહીં મેયર મામદાનીના આક્રમક સાથી અને કટ્ટરપંથી મહિલા ઉમેદવાર ડેરિયાલિઝા અવિલા શેવેલિયરે પાંચ ટર્મથી કોંગ્રેસના સભ્ય અને અદભુત સત્તા બેઝ ધરાવતા ડોમિનિકન-અમેરિકન નેતા એડ્રિયાનો એસ્પાયલેટને ધૂળ ચટાડી દીધી છે. આ જિલ્લામાં કુલ 4,49,000 સક્રિય મતદારો હોવા છતાં, અવિલા શેવેલિયરે માત્ર આશરે 33,000 મતો મેળવીને ઐતિહાસિક વિજય મેળવ્યો છે. અશ્વેત બહુલ વિસ્તાર ગણાતા હાર્લેમમાં પણ એસ્પાયલેટ વિરુદ્ધ ગયેલા મતોએ બળતામાં ઘી હોમવાનું કામ કર્યું હતું.

રાજકીય વિશ્લેષક પ્રોફેસર જેસી પોલાન્કોનું મોટું નિવેદન:

"આ પરંપરાગત ડેમોક્રેટ્સ માટે એક 'રેડ વેડિંગ' સમાન સાબિત થયું છે જ્યાં સ્થાપિત નેતાઓ એક ઝાટકે શિકાર બની ગયા. ડેમોક્રેટિક સોશિયાલિસ્ટ્સ ઓફ અમેરિકા (DSA) એ બતાવી આપ્યું છે કે જ્યાં સામાન્ય જનતા મતદાન કરવા બહાર નથી નીકળતી, ત્યાં પોતાની મજબૂત કેડર અને સંગઠનના જોરે પ્રાઇમરી ચૂંટણીઓ કેવી રીતે જીતી શકાય. આ નેતાઓએ સ્થાનિક સ્તરે આખી પાર્ટી પર વ્યવસ્થિત રીતે કબજો જમાવી લીધો છે."

કોલેજ ગ્રેજ્યુએટ્સ અને ઉચ્ચ આવક ધરાવતા યુવાનો બન્યા પાવર બેઝ

આર્થિક અને રાજકીય વિશ્લેષકોના મતે, મામદાની સમર્થિત ઉમેદવારોની આ ભવ્ય જીત પાછળ પક્ષના પરંપરાગત કામદાર વર્ગ કે લઘુમતીઓ નહીં, પરંતુ ઉચ્ચ કમાણી કરનારા, કોલેજ-શિક્ષિત અને મુખ્યત્વે યુવાન શ્વેત મતદારોનું ગઠબંધન જવાબદાર છે. વસ્તી ગણતરીના આંકડા મુજબ આ વિસ્તારોમાં શ્વેત વસ્તી માત્ર 15% થી 37% ની વચ્ચે છે, પરંતુ મતદાનના દિવસે ડીએસએના પક્ષમાં 68% જેટલા શ્વેત મતદારો તૂટી પડ્યા હતા. આ જ રીતે 7મા હાઉસ ડિસ્ટ્રિક્ટમાંથી ડીએસએના ક્લેર વાલ્ડેઝ અને 10મા જિલ્લામાંથી પૂર્વ સિટી કંટ્રોલર બ્રેડ લેન્ડરે પણ ઉચ્ચ આવક ધરાવતા સમૃદ્ધ વિસ્તારોમાં વિપુલ મતો મેળવીને વિજય કુચ કરી છે.

માર્કેટિંગ અને ગ્રાઉન્ડ કનેક્ટે અપાવી અદ્ભુત સફળતા

નીતિ સલાહકારોનું માનવું છે કે પરંપરાગત ડેમોક્રેટ્સ કે રિપબ્લિકન પક્ષો હવે યુવાનોને ઉત્સાહિત કરવામાં કે નવા મતદારોને આકર્ષવામાં નિષ્ફળ રહ્યા છે. બીજી તરફ, ડીએસએ (DSA) ની ટીમે વન-ટુ-વન માર્કેટિંગ અને પીઅર પ્રેશર (મિત્રો દ્વારા કરાતી ભલામણ) નો અદભુત ઉપયોગ કર્યો છે. જે રીતે લોકો કોઈ ખાસ મુવી કે વેબ સિરીઝ જોવા માટે પોતાના મિત્રોના કહેવા પર દોડી જાય છે, બરાબર એ જ રીતે આ સોશિયલિસ્ટ જૂથે યુવાનોના નેટવર્કનો ઉપયોગ કરીને વોટ મેળવ્યા છે. આ આક્રમક વ્યૂહરચનાના કારણે આગામી સમયમાં ન્યૂ યોર્ક સિટીના ગ્રેસી મેન્શન (મેયર નિવાસસ્થાન) અને વહીવટીતંત્ર પર કટ્ટર ડાબેરી વિચારધારાનો પ્રભાવ નોંધપાત્ર રીતે વધી જશે તે નક્કી છે.