મુંબઈ : રાજકારણ અને બોલિવૂડ વચ્ચેનો સંબંધ હંમેશા ગાઢ રહ્યો છે, પરંતુ રાઘવ ચઢ્ઢાના આમ આદમી પાર્ટી છોડીને ભાજપમાં જોડાવાના નિર્ણયે મનોરંજન જગતમાં મોટો વિવાદ છેડ્યો છે. અભિનેત્રી પરિણીતિ ચોપડાના પતિ અને યુવા નેતા રાઘવ ચઢ્ઢાના આ ઓચિંતા પગલાથી સામાન્ય જનતા તો આશ્ચર્યમાં છે જ, પરંતુ બોલિવૂડની જાણીતી હસ્તીઓએ પણ હવે આક્રમક પ્રતિક્રિયાઓ આપવાનું શરૂ કર્યું છે. આ કડીમાં 'બિગ બોસ ૧૯'ની પૂર્વ સ્પર્ધક અને પીઢ અભિનેત્રી કુનિકા સદાનંદે રાઘવ ચઢ્ઢા પર તીખા પ્રહારો કર્યા છે.
કુનિકા સદાનંદે સોશિયલ મીડિયા પ્લેટફોર્મ 'X' પર પોતાની નારાજગી વ્યક્ત કરતા એક લાંબી પોસ્ટ શેર કરી છે, જે હાલમાં જોરદાર વાયરલ થઈ રહી છે. કુનિકાએ લખ્યું કે, "મારી પાસે શબ્દો ખૂટી રહ્યા છે. રાઘવ ચઢ્ઢા મારી નજરમાં એક અત્યંત વિશ્વાસપાત્ર અને સકારાત્મક ઉર્જા ધરાવતા વ્યક્તિ હતા. મને હંમેશા લાગતું હતું કે તેઓ બિલકુલ સાચા રસ્તા પર છે. હકીકતમાં જ્યારે તેમણે પરિણીતિ ચોપડા સાથે લગ્ન કર્યા, ત્યારે હું પરિણીતિ માટે ખૂબ જ ખુશ હતી કે તેને એક આશાસ્પદ અને પ્રામાણિક જીવનસાથી મળ્યો છે."
પોતાની પરખ પર ઉઠાવ્યા સવાલ:
અભિનેત્રીએ વધુમાં ઉમેર્યું કે તેઓ કોઈ પક્ષના વિરોધમાં નથી, પરંતુ રાઘવની બદલાયેલી વિચારધારાથી તેમને આંચકો લાગ્યો છે. તેમણે લખ્યું, "હું તેમને જજ નથી કરી રહી, પણ આજે હું મારી પોતાની પરખ અને અંતર્જ્ઞાન (intuition) પર સવાલ ઉઠાવી રહી છું. આ માત્ર એટલા માટે નથી કે તેમણે કોઈ ચોક્કસ પાર્ટી જોઈન કરી છે, પરંતુ જે રીતે તેમણે પોતાની જૂની ઓળખ અને કામ કરવાની રીતને છોડી દીધી છે તે જોઈને આઘાત લાગ્યો છે. મને આમ આદમી પાર્ટી માટે ખૂબ જ ખરાબ લાગી રહ્યું છે. આ પક્ષ પલટા પાછળ ચોક્કસ કોઈ મોટા કારણો હશે, પણ મને આનાથી ખૂબ જ દુઃખ થયું છે."
રાઘવ ચઢ્ઢાના આ નિર્ણયથી પરિણીતિ ચોપડાના ચાહકો પણ બે ભાગમાં વહેંચાઈ ગયા છે. એક તરફ સોશિયલ મીડિયા પર 'અનફોલો' અભિયાન ચાલી રહ્યું છે, તો બીજી તરફ કુનિકા સદાનંદ જેવી સેલિબ્રિટીઝની આકરી ટિપ્પણીઓ રાઘવની મુશ્કેલીમાં વધારો કરી રહી છે. રાજકીય મોરચે જે પણ કારણ હોય, પરંતુ ગ્લેમર જગતમાં અત્યારે રાઘવ ચઢ્ઢા 'વિલન' તરીકે પ્રોજેક્ટ થઈ રહ્યા હોય તેવું વાતાવરણ સર્જાયું છે.