નવી દિલ્હી :   કોંગ્રેસ નેતા રાહુલ ગાંધીને તેમની અપ્રમાણસર સંપત્તિના આરોપો સંબંધિત કેસમાં સુપ્રીમ કોર્ટમાંથી હાલ પૂરતી મોટી રાહત મળી છે. અલ્હાબાદ હાઇકોર્ટના તપાસ સંબંધિત આદેશ અને કાર્યવાહીને પડકારતી રાહુલ ગાંધીની અરજી પર સુનાવણી કરતા સર્વોચ્ચ અદાલતે બંને પક્ષોને પોતાની દલીલો અને લેખિત દસ્તાવેજો પૂર્ણ કરવા માટે ૩ અઠવાડિયાનો સમય આપ્યો છે. આ સાથે કોર્ટે અગાઉ આપેલો વચગાળાનો રાહત આદેશ પણ આ સમયગાળા દરમિયાન અમલમાં રાખવાનો નિર્ણય કર્યો છે.

સીજેઆઈ સૂર્યકાંતની આગેવાની હેઠળની બેન્ચે આ મામલે સુનાવણી હાથ ધરી હતી. સુપ્રીમ કોર્ટે સ્પષ્ટ કર્યું છે કે ૩ અઠવાડિયાની આ સમયમર્યાદા દરમિયાન બંને પક્ષોએ પોતપોતાના લેખિત દસ્તાવેજો - જેમાં અરજી, જવાબ અને જો કોઈ પુનઃરજૂઆત હોય તો તે - નિર્ધારિત મર્યાદામાં કોર્ટમાં ફાઇલ કરવાની રહેશે. આ કેસ હવે ૩ અઠવાડિયા પછી ફરી લિસ્ટ કરવામાં આવશે. સુપ્રીમ કોર્ટે અગાઉ અલ્હાબાદ હાઇકોર્ટની કાર્યવાહી પર સ્ટે મૂક્યો હોવાથી CBI અને ED હાલ આ કેસમાં પોતાનો રિપોર્ટ સબમિટ કરી શકશે નહીં.

આ સમગ્ર કેસ કર્ણાટક ભાજપના કાર્યકર એસ. વિગ્નેશ શિશિરની ફરિયાદથી શરૂ થયો હતો, જેમાં આરોપ મૂકવામાં આવ્યો હતો કે રાહુલ ગાંધી પાસે તેમની આવકના જાણીતા સ્ત્રોતો કરતાં વધુ અપ્રમાણસર સંપત્તિ છે. મે ૨૦૨૬ માં અલ્હાબાદ હાઇકોર્ટે નિર્દેશ આપ્યો હતો કે જો ફરિયાદ મળે તો કાયદા અનુસાર આરોપોની તપાસ થવી જોઈએ અને તે મુજબ સીબીઆઈ અથવા ઈડી જરૂરી કાર્યવાહી કરી શકે છે.

જોકે, હાઇકોર્ટની ન્યાયાધીશ રાજેશ સિંહ ચૌહાણ અને બ્રિજ રાજ સિંહની ડિવિઝન બેન્ચે સીબીઆઈ દ્વારા દાખલ કરવામાં આવેલા પ્રતિ-સોગંદનામા સામે ભારે અસંતોષ વ્યક્ત કર્યો હતો. કોર્ટે નોંધ્યું હતું કે એજન્સીનો જવાબ કેસમાં થયેલી તપાસની પ્રગતિ સ્પષ્ટ કરવામાં નિષ્ફળ રહ્યો હતો. જેથી હાઇકોર્ટે સીબીઆઈને તેના સંયુક્ત નિર્દેશક અથવા ઝોનના વડા (ACHQ ઝોન, નવી દિલ્હી) મારફતે નવો અને સ્પષ્ટ જવાબ દાખલ કરવા આદેશ કર્યો હતો. હાઇકોર્ટના આ નિર્દેશો અને તપાસના આદેશ સામે રાહુલ ગાંધીએ સુપ્રીમ કોર્ટના દરવાજા ખટખટાવ્યા હતા, જ્યાંથી તેમને ૩ અઠવાડિયાની વધુ રાહત પ્રાપ્ત થઈ છે.