રાહુલ ગાંધી સોમવારે દિલ્હીના યમુના કિનારે આવેલ બેલા એસ્ટેટમાં ઝૂંપડીઓમાં રહેતા લોકોને મળવા પહોંચ્યા હતા. રાહુલે સોશિયલ મીડિયા પર એક વીડિયો શેર કરતા લખ્યું હતું કે- અહીં 728 લોકો રહે છે. SIR બાદ મતદાર યાદીમાંથી માત્ર એક નામ બચ્યું છે અને બાકીના 727 નામ કપાયા હતા. રાહુલ ગાંધી એ જણાવ્યું કે, આ લોકો દાયકાઓથી અહીં રહે છે. 2024 લોકસભા, 2025ની દિલ્હી વિધાનસભા ચૂંટણીમાં પણ તેમણે મતદાન કર્યું છે. 2023માં તેમના ઘર તોડી પડાયા હતા પરંતુ તેઓ અહીં જ રહ્યા. રાહુલ ગાંધી એ SDMને ફોન લગાવ્યો અને તેમના વિશે સવાલ કર્યો અને કહ્યું કે- ઘર હોય કે ના હોય તેનો મતાધિકારથી કોઈ સંબંધ નથી. 

રાહુલે દાવો કર્યો કે, ‘ચીફ ઈલેક્શન કમિશનર જ્ઞાનેશ કુમાર પોતે જ કહી ચૂક્યા છે કે-‘હાઉસ નંબર 0’ એ ઘરવિહોણા લોકો માટે છે. તો પછી 727 લોકોના નામ કેવી રીતે કપાયા. આ SIR નથી પરંતુ વોટ ચોરીનો એક પ્રકાર છે. જેમની પાસે પહેલાથી જ ઓછી અને મર્યાદિત તાકાત છે. તેમની એકમાત્ર તાકાત પણ છીનવી લેવામાં આવી રહી છે. જ્ઞાનેશ કુમાર તો જશે જ પરંતુ જે સિસ્ટમે તેમની પાસે આ કામ કરાવડાવ્યું છે તે પણ જશે.’ 

રાહુલે જ્યારે એસડીએમને ફોન કર્યો તો તેઓ સાંસદના સવાલોનો જવાબ બરોબર ના આપી શક્યા. આ દરમિયાન તેમણે એસડીએમને સવાલ કર્યો કે- તમે તમારું સંપૂર્ણ નામ જણાવો, હું તમને બીજી રીતે જોઈ લઈશ. 

31 ઓગસ્ટે જાહેર થયેલ ડ્રાફ્ટ વોટર લિસ્ટમાં લગભગ 97 લાખ નામ છે. આ અગાઉ દિલ્હીના 1.45 કરોડ મતદાર હતા. લગભગ 47.5 લાખ નામ કપાયા હોવાનું સામે આવ્યું. 33 લાખથી વધુ મતદારોને તેમને એન્યૂમરેશન ફોર્મમાં વાંધાઓને કારણે નોટિસ મોકલવામાં આવી છે. 4 ડિસેમ્બરે દિલ્હીની અંતિમ મતદાર યાદી સામે આવશે. જે લોકોના નામ નથી આવ્યા તેઓ ERO પાસે નામ જોડવા માટે અરજી કરી શકે છે.