મુંબઈ તા.૩૦: મુંબઈના છત્રપતિ શિવાજી મહારાજ આંતરરાષ્ટ્રીય એરપોર્ટ પર અમેરિકાથી પેરિસ થઈને આવેલા ૩૬ વર્ષના હાર્દિક શુક્‍લાની સહાર પોલીસે ધરપકડ કરી છે. મૂળ રાજકોટના રહેવાસી હાર્દિકે ઇમિગ્રેશન તપાસ દરમ્‍યાન પોતાનો ભારતીય પાસપોર્ટ રજૂ કર્યો હતો. જોકે પાસપોર્ટ સ્‍વોપ મશીનમાં તપાસ કરતી વખતે એ પાસપોર્ટ નંબર અન્‍ય વ્‍યક્‍તિના નામે નોંધાયેલો હોવાનું બહાર આવ્‍યું હતું. આથી શંકા જતાં ઇમિગ્રેશન અધિકારીઓએ તેને તાત્‍કાલિક તાબામાં લઈને વિગતવાર પૂછપરછ હાથ ધરી હતી જેમાં એ બોગસ પાસપોર્ટ હોવાનું પ્રકાશમાં આવ્‍યું હતું. આ કેસમાં હાર્દિક અને તેને બોગસ પાસપોર્ટ તૈયાર કરી આપનાર એજન્‍ટની તપાસ હાથ ધરવામાં આવી છે.

સહાર પોલીસ-સ્‍ટેશનના એક સિનિયર અધિકારીએ કહ્યું હતું કે ‘તપાસ દરમ્‍યાન સામે આવ્‍યું કે હાર્દિક શુક્‍લા ૨૦૧૫માં ટૂરિસ્‍ટ વીઝા પર અમેરિકા ગયો હતો, જ્‍યાં તેનો મૂળ પાસપોર્ટ ખોવાઈ ગયો હતો. ત્‍યાર બાદ મુદત પૂરી થતાં તેણે એક એજન્‍ટ મારફતે ગેરકાયદેસર રીતે ખોટી માહિતી રજૂ કરીને અમદાવાદ પાસપોર્ટ ઓફિસમાંથી નવો પાસપોર્ટ મેળવ્‍યો હતો. તેણે રજૂ કરેલો પાસપોર્ટ ખરેખર હર્ષ યાદવ નામના અન્‍ય નાગરિકના નામે મુંબઈથી ઇશ્‍યુ થયેલો હતો જેના પર હાર્દિક શુક્‍લાની વિગતો છાપીને બોગસ પાસપોર્ટ તૈયાર કરવામાં આવ્‍યો હતો. ઇમિગ્રેશન વિભાગની પ્રાથમિક તપાસમાં ગેરરીતિ અને છેતરપિંડી સાબિત થતાં અધિકારીઓના નિર્દેશાનુસાર આરોપી હાર્દિક શુક્‍લા તેમ જ તેને બોગસ પાસપોર્ટ બનાવી આપનાર એજન્‍ટ સામે અમે ફરિયાદ નોંધ કરી હાર્દિકની ધરપકડ કરવામાં આવી છે. આ કેસમાં આરોપી એજન્‍ટની શોધ હાથ ધરવામાં આવી છે