અયોધ્યા : અયોધ્યાના ભવ્ય રામ મંદિરમાં દાનની રકમ અને પ્રસાદમાં થયેલી ચોરીના ગંભીર મામલામાં આજે રવિવારે પોલીસે આક્રમક કાર્યવાહી હાથ ધરી હતી. અયોધ્યા જન્મભૂમિ પોલીસ સ્ટેશનની ટીમોએ મુખ્ય સૂત્રધાર રામશંકર યાદવ ઉર્ફે ટીનુ સહિત ૮ આરોપીઓના નિવાસસ્થાને એકસાથે દરોડા પાડ્યા હતા. આ કેસમાં ટીનુ, અવિનાશ શુક્લા, અનુકુલ મિશ્રા, લવકુશ મિશ્રા, મનીષ યાદવ સહિતના આરોપીઓની ધરપકડ કરવામાં આવી છે, જ્યારે મુખ્ય આરોપીઓના ઘરે તાળા મારેલા હોવાથી પરિવારજનો ફરાર હોવાનું સામે આવ્યું છે.

તપાસમાં સામે આવ્યું છે કે ઓટો ચલાવતો ટીનુ મંદિરના વહીવટમાં ઊંડી પકડ જમાવીને કરોડોની સંપત્તિ બનાવી બેઠો હતો, જેની પાસે દાનપેટીની ચાવીઓ રહેતી હતી. અન્ય આરોપીઓએ બેંક જમા કરાવતી વખતે રોકડ ચોરીને બાથરૂમમાં છુપાવી હતી, તેમજ લવકુશ મિશ્રાના ઘરેથી અગાઉ પણ ૧૨ લાખ રૂપિયા મળી આવ્યા હતા. આરોપીઓ મંદિરના વહીવટી તંત્રના નજીકના હોવાનો લાભ ઉઠાવી લાંબા સમયથી પવિત્ર દાનની રકમમાં મોટું કૌભાંડ આચરી રહ્યા હતા.

પોલીસ દ્વારા અત્યાર સુધીના દરોડામાં કેસ સંબંધિત મહત્વના પુરાવાઓ એકત્રિત કરવામાં આવ્યા છે અને તમામ આરોપીઓની સઘન પૂછપરછ શરૂ કરવામાં આવી છે. આ કૌભાંડે મંદિરના કર્મચારીઓની વિશ્વસનીયતા પર ગંભીર સવાલો ઉભા કર્યા છે. જન્મભૂમિ પોલીસ દ્વારા સમગ્ર મામલાની ઝીણવટભરી તપાસ ચલાવવામાં આવી રહી છે, જેથી ભવિષ્યમાં આ પ્રકારની કોઈ પણ ગેરરીતિ ન થાય તે માટે વહીવટી તંત્ર દ્વારા કડક સુરક્ષા અને પારદર્શક પદ્ધતિઓ અપનાવવામાં આવશે.

આ ઘટના બાદ મંદિર ટ્રસ્ટ અને સ્થાનિક તંત્ર હરકતમાં આવ્યું છે. આરોપીઓએ વસાવેલી મિલકતોની પણ તપાસ થઈ રહી છે અને કાનૂની કાર્યવાહી તેજ કરવામાં આવી છે. લાખો શ્રદ્ધાળુઓની આસ્થા સાથે જોડાયેલા આ મુદ્દાને લઈને તંત્ર કોઈપણ બાંધછોડ કરવાના મૂડમાં નથી. આ સમગ્ર કૌભાંડ પાછળના અન્ય કોઈ મોટા માથા સંડોવાયેલા છે કે કેમ, તે દિશામાં પણ પોલીસ હવે આગળની તપાસ કરી રહી છે.