બેંગલુરુ: બોલિવૂડ સુપરસ્ટાર રણવીર સિંહ માટે 'કાંતારા' મિમિક્રી વિવાદમાં રાહતના સમાચાર સામે આવ્યા છે, પરંતુ આ રાહત એક ખાસ શરત સાથે મળી છે. વર્ષ ૨૦૨૫માં ગોવા ખાતે આયોજિત આંતરરાષ્ટ્રીય ફિલ્મ ફેસ્ટિવલ (IFFI) દરમિયાન રણવીરે દક્ષિણ ભારતીય ફિલ્મ 'કાંતારા'ના એક દ્રશ્યની નકલ કરી હતી, જેમાં તેણે દેવતાને "સ્ત્રી ભૂત" તરીકે ઓળખાવ્યા હતા. આ ટિપ્પણીથી લાખો ભક્તોની ધાર્મિક આસ્થાને ઠેસ પહોંચી હોવાના આક્ષેપ સાથે કર્ણાટકમાં તેની સામે કાયદેસરની કાર્યવાહી શરૂ કરવામાં આવી હતી. કર્ણાટક હાઈકોર્ટે હવે આ કેસને રદ કરી દીધો છે, પરંતુ એક્ટરને આદેશ આપ્યો છે કે તેણે મૈસુરના પવિત્ર ચામુંડેશ્વરી મંદિરે જઈને આશીર્વાદ લેવા પડશે અને પોતાની ભૂલ માટે ક્ષમા માંગવી પડશે.

કોર્ટમાં સુનાવણી દરમિયાન રણવીર સિંહના વકીલ સાજન પૂવૈયાએ જણાવ્યું હતું કે અભિનેતા કોઈની આસ્થાને ઠેસ પહોંચાડવા માંગતો ન હતો અને તેમણે કોર્ટમાં બિનશરતી માફીનું એફિડેવિટ રજૂ કર્યું હતું. જજે અવલોકન કર્યું હતું કે જાહેરમાં કરવામાં આવેલા આવા વ્યવહારથી લોકોની લાગણી દુભાઈ છે, તેથી માત્ર કાગળ પરની માફી પૂરતી નથી. એક્ટરે હવે આગામી ચાર અઠવાડિયાની અંદર મૈસુર જઈને મંદિરમાં વિધિવત પૂજા અને પ્રાર્થના કરવી પડશે. જોકે, સુરક્ષાના કારણોસર રણવીર કઈ તારીખે મંદિર જશે તે અંગેની કોઈ ચોક્કસ માહિતી જાહેર કરવામાં આવી નથી. સોશિયલ મીડિયા પર વાયરલ થયેલા તે મિમિક્રી વીડિયો બાદ રણવીરને ભારે ટ્રોલિંગ અને ટીકાઓનો સામનો કરવો પડ્યો હતો.

વ્યક્તિગત જીવનમાં રણવીર સિંહ અને દીપિકા પાદુકોણ ટૂંક સમયમાં બીજી વખત માતા-પિતા બનવા જઈ રહ્યા છે, ત્યારે આ કાનૂની વિવાદમાંથી મુક્તિ મળવી તેમના પરિવાર માટે મોટી રાહત સમાન છે. ફિલ્મ 'કાંતારા'ની સફળતા બાદ તેમાં દર્શાવવામાં આવેલી દૈવી સંસ્કૃતિ અને 'ભૂત કોલા' પરંપરા પ્રત્યે લોકોમાં ભારે આદર છે, જેના કારણે રણવીરની મજાકને લોકોએ ગંભીરતાથી લીધી હતી. હવે કોર્ટના આદેશ મુજબ રણવીરના આ પાશ્ચાતાપ બાદ આ વિવાદ પર કાયમી પૂર્ણવિરામ મુકાય તેવી શક્યતા છે. ચાહકો હવે એ જોવાની રાહ જોઈ રહ્યા છે કે રણવીર ક્યારે મૈસુર જઈને પોતાની આ કાયદેસરની અને આધ્યાત્મિક શરત પૂરી કરે છે.