ડિંડોરી : મધ્યપ્રદેશના ડિંડોરી જિલ્લામાંથી એક અત્યંત હૃદયદ્રાવક અને ચોંકાવનારી ઘટના પ્રકાશમાં આવી છે, જ્યાં એક ૩૫ વર્ષીય યુવકને તેના જ પરિચિત દ્વારા રસગુલ્લાના વેશમાં ડુક્કર મારવાનો બોમ્બ ખવડાવી દેવામાં આવતા મોંમાં થયેલા ગંભીર વિસ્ફોટથી તેનું કરૂણ મૃત્યુ થયું છે.

પ્રાપ્ત વિગતો અનુસાર, આ આઘાતજનક બનાવ મંગળવારે સાંજે પદરિયા ચાંટા ગામમાં બન્યો હતો, જ્યાં રાજેન્દ્ર નામના યુવક સાથે તેનો મિત્ર રામભગત બારૌતિયા બેઠો હતો અને વાતચીત દરમિયાન તેણે રાજેન્દ્રને રસગુલ્લા હોવાનું કહીને શિકારી બોમ્બ આપી દીધો હતો.

મીઠાઈ સમજીને રાજેન્દ્રે તરત જ તે બોમ્બ મોંમાં મૂકીને ચાવવાનો પ્રયાસ કર્યો હતો, જેના કારણે સહેજ દબાણથી જ જોરદાર વિસ્ફોટ થયો હતો અને તેના મોં તથા જડબાના ભાગે ગંભીર ઈજાઓ પહોંચતા પરિવારજનો તેને તાત્કાલિક હોસ્પિટલ લઈ ગયા હતા.

હોસ્પિટલ ખાતે ફરજ પરના તબીબો દ્વારા ટૂંકી સારવાર બાદ રાજેન્દ્રને મૃત જાહેર કરવામાં આવ્યો હતો, જેના પગલે પોલીસ દ્વારા બુધવારે સવારે પોસ્ટમોર્ટમની કાર્યવાહી પૂર્ણ કરી મૃતદેહ પરિવારને સોંપવામાં આવ્યો હતો અને સમગ્ર મામલે ગુનો નોંધવામાં આવ્યો હતો.

પોલીસ અધિકારીઓના જણાવ્યા મુજબ, આરોપી રામભગત વિરુદ્ધ ભારતીય દંડ સંહિતાની સંબંધિત કલમો તેમજ વિસ્ફોટક અધિનિયમ હેઠળ કેસ નોંધીને તપાસ હાથ ધરવામાં આવી છે કે આ ખતરનાક બોમ્બ ક્યાંથી લાવવામાં આવ્યો હતો અને તેનો હેતુ શું હતો.
 

ઉલ્લેખનીય છે કે આવા ગનપાઉડર અને પોટાશથી બનતા બોમ્બનો ઉપયોગ સામાન્ય રીતે જંગલી પ્રાણીઓ કે ડુક્કરના શિકાર માટે કરવામાં આવતો હોય છે, ત્યારે આ અઘટિત ઘટનાથી સમગ્ર વિસ્તારમાં ભારે ચકચાર અને સોંપો પડી ગયો છે.