*બપોરે બે વાગ્યા સુધી ૨૦ જિલ્લામાં ધોધમાર વરસાદનું સંકટ: દક્ષિણ અને મધ્ય ગુજરાતમાં ભારેથી અતિ ભારે વરસાદની ચેતવણી*

અમદાવાદ: હવામાન કેન્દ્રના તાત્કાલિક વરસાદી પૂર્વાનુમાન મુજબ આજે બપોરે બે વાગ્યા સુધી રાજ્યના આશરે ૨૦ જિલ્લામાં ગાજવીજ સાથે ભારેથી અતિ ભારે વરસાદ પડવાની શક્યતા છે. દક્ષિણ ગુજરાત ઉપરાંત મધ્ય ગુજરાત અને સૌરાષ્ટ્રના કેટલાક વિસ્તારોમાં પણ વરસાદનું જોર વધી શકે છે. રાજ્યમાં સક્રિય ચોમાસાની પરિસ્થિતિને કારણે અતિ તીવ્ર વરસાદ, વીજળી અને ભારે પવનની શક્યતા વ્યક્ત કરવામાં આવી છે. હવામાન વિભાગે ગુજરાતમાં આગામી દિવસો દરમિયાન પણ ભારે વરસાદની ગતિવિધિ ચાલુ રહેવાની આગાહી કરી છે.  નીચાણવાળા વિસ્તારો, નદીકાંઠા અને કોઝવે નજીક રહેતા લોકોને પાણીના પ્રવાહ વચ્ચે અવરજવર નહીં કરવા તથા સ્થાનિક તંત્રની સૂચનાઓનું પાલન કરવા જણાવાયું છે.

*પૂર્ણા, અંબિકા અને કાવેરીમાં ઘોડાપૂરઃ નવસારી-વલસાડમાં સ્થિતિ અતિગંભીર:

કાવેરી નદી ભયજનક સપાટીથી ત્રણ ફૂટ ઉપરઃ અનેક ગામો અને નીચાણવાળા વિસ્તારો હાઈ એલર્ટ પર*

નવસારી અને વલસાડ જિલ્લામાં સતત વરસતા અનરાધાર વરસાદથી પૂરનું સંકટ વધુ ગંભીર બન્યું છે. પૂર્ણા નદીનું જળસ્તર ૨૨ ફૂટે પહોંચ્યું છે અને તેની ભયજનક સપાટી ૨૩ ફૂટ છે. અંબિકા નદી ૨૯ ફૂટની ભયજનક સપાટીને અડી ગઈ છે, જ્યારે કાવેરી નદી ૧૯ ફૂટની ભયજનક સપાટી સામે ૨૨ ફૂટે વહી રહી છે. પરિણામે નદીકાંઠાના ગામો અને નીચાણવાળા વિસ્તારોમાં હાઈ એલર્ટ જાહેર કરાયો છે. વલસાડ જિલ્લામાં અસાધારણ વરસાદથી વ્યાપક જળબંબાકાર સર્જાયો છે અને જિલ્લા તંત્ર દ્વારા બચાવ-રાહત કામગીરી હાથ ધરાઈ છે.  નવસારીના ખેરગામમાં માત્ર ૧૨ કલાકમાં નવ ઇંચ વરસાદ નોંધાતા સ્થાનિક નદી-નાળા છલકાયા છે.

*રેલવે ટ્રેક પાણીમાં ગરકઃ ગુજરાત, વંદે ભારત અને શતાબ્દી એક્સપ્રેસ રદ:

મુંબઈ-અમદાવાદ રેલ વ્યવહારને મોટો ફટકોઃ પ્રવાસીઓને ટ્રેનની સ્થિતિ ચકાસીને જ નીકળવા અપીલ*

મુંબઈ અને દક્ષિણ ગુજરાતમાં અતિ ભારે વરસાદના કારણે પશ્ચિમ રેલવેના કેટલાક ભાગોમાં ટ્રેક ઉપર પાણી ભરાતાં મુંબઈથી ગુજરાત તરફ આવતી મહત્વની ટ્રેનો રદ કરવામાં આવી છે. આજે મુંબઈ સેન્ટ્રલથી અમદાવાદ આવતી ગુજરાત સુપરફાસ્ટ એક્સપ્રેસ, મુંબઈ સેન્ટ્રલથી ગાંધીનગર કેપિટલ આવતી વંદે ભારત એક્સપ્રેસ તથા મુંબઈ-અમદાવાદ શતાબ્દી એક્સપ્રેસનો પ્રવાસ રદ કરાયો છે. ભારે વરસાદથી રેલવે સિગ્નલિંગ, ટ્રેકની સલામતી અને ટ્રેનોની અવરજવર ઉપર અસર સર્જાઈ છે. અગાઉ પણ મુંબઈના નાલાસોપારા-વસઈ રોડ સહિતના વિભાગોમાં ટ્રેક પર પાણી ભરાતા મુંબઈ-ગુજરાત માર્ગની અનેક ટ્રેનો રોકવી કે રદ કરવી પડી હતી.  મુસાફરોને સ્ટેશન પહોંચતા પહેલાં રેલવેની સત્તાવાર પૂછપરછ સેવા અથવા ટ્રેન સ્ટેટસ તપાસવા જણાવાયું છે.

*અમદાવાદમાં ધોધમાર એન્ટ્રીઃ રસ્તાઓ પર પાણી, અનેક વિસ્તારોમાં વાહનવ્યવહાર ધીમો: સવારે સાડા દસ વાગ્યે પણ વરસાદ યથાવતઃ યુનિવર્સિટી વિસ્તારની હોસ્ટેલ બહાર પાણી ભરાયા*

અમદાવાદ: (કેતન ખત્રી દ્વારા) આજે વહેલી સવારથી વરસાદનું જોર વધ્યું હતું અને સવારે સાડા દસ વાગ્યે પણ શહેરના અનેક વિસ્તારોમાં ભારે વરસાદ ચાલુ રહ્યો હતો. પશ્ચિમ, મધ્ય, પૂર્વ અને ઉત્તર અમદાવાદના વિવિધ વિસ્તારોમાં વરસાદથી મુખ્ય તથા આંતરિક માર્ગો ઉપર પાણી ભરાતાં વાહનવ્યવહાર ધીમો પડ્યો હતો. ગુજરાત યુનિવર્સિટી વિસ્તારમાં આવેલી સમરસ કન્યા છાત્રાલય બહારના માર્ગ ઉપર પાણી ભરાતા વિદ્યાર્થીનીઓને મુશ્કેલીનો સામનો કરવો પડ્યો હતો.  શહેરમાં ધોધમાર વરસાદ સાથે કેટલાક વિસ્તારોમાં પાણી ભરાયાના અહેવાલો મળ્યા છે.  હવામાન વિભાગે અમદાવાદ અને આસપાસના વિસ્તારોમાં વાદળછાયા વાતાવરણ સાથે વરસાદ અથવા ગાજવીજવાળા વરસાદના એકથી બે તીવ્ર રાઉન્ડની શક્યતા વ્યક્ત કરી છે.  બપોર સુધી વરસાદી માહોલ યથાવત રહેવાની સંભાવના છે.