મુંબઈ, તા.૦૪: રીલ લાઈફમાં વિલન કે હીરોના રોલ કરતા બોલીવુડ અભિનેતા સોનુ સૂદ વાસ્તવિક જીવનમાં કરોડો લોકો માટે 'રીયલ હીરો' સાબિત થઈ રહ્યા છે. કોરોના મહામારીમાં પ્રવાસી શ્રમિકોના તારણહાર બનેલા સોનુ સૂદે ફરી એકવાર પોતાની માનવતાનો અદ્ભુત પરિચય આપ્યો છે. હાલમાં નેપાળમાં નેપાળ-તિબેટ સરહદ નજીક બરફ અને પહાડો ધસી પડવાના કારણે આવેલી વિનાશક પૂરની હોનારતમાં ૧,૨૦૦થી વધુ લોકોએ પોતાના જીવ ગુમાવ્યા છે અને ૪,૦૦૦ જેટલા લોકો હજુ પણ ગુમ છે. આવી કપરી અને ભયાનક પરિસ્થિતિમાં અસરગ્રસ્તોનો હાથ ઝાલવા સોનુ સૂદ પોતે મદદનો મોટો જથ્થો લઈને કાઠમંડુ પહોંચી ગયો છે.

ભયાનક પૂરની સેલગાહ વચ્ચે પણ અડીખમ ઊભેલા એકમાત્ર ઘરના રહેવાસીઓ અને માસૂમ બાળકોને મળીને સોનુ સૂદે તેમને સાંત્વના આપી હતી. સોશિયલ મીડિયા પર ભાવુક તસવીરો શેર કરતા તેણે લખ્યું કે, "આ બાળકોએ પોતાના ઘર, પરિવાર અને બાળપણ ગુમાવ્યું છે, પણ આપણે સૌ સાથે મળીને તેમને એક નવી શરૂઆત કરવામાં મદદ કરીશું. નેપાળ, તમે એકલા નથી!" સોનુ સૂદે સ્પષ્ટ કર્યું છે કે તેમની 'સૂદ ચેરિટી ફાઉન્ડેશન' ટીમ માત્ર ખાવા-પીવાનો સામાન અને કપડાં-કંબલ જ નથી આપી રહી, પરંતુ સ્થળ પર જઈને લોકોની જરૂરિયાતોનું મૂલ્યાંકન કરી રહી છે જેથી ભારતથી જરૂરી તમામ સામગ્રી સતત પહોંચાડી શકાય.

મહત્ત્વની વાત એ છે કે આ રાહત કાર્ય માત્ર એક-બે દિવસ કે આ અઠવાડિયા પૂરતું સીમિત નહીં રહે. અભિનેતાએ વચન આપ્યું છે કે તેમની સંસ્થા આગામી મહિનાઓ સુધી પૂરપીડિતોને આશ્રય, ભોજન અને જીવન ફરી પાટા પર લાવવા માટે તમામ શક્ય મદદ પૂરી પાડતી રહેશે. ઉલ્લેખનીય છે કે, પંજાબના ૨૦૨૫ના પૂર સમયે મદદ કરવાની વાત હોય કે પછી દુબઈમાં ફસાયેલા મુસાફરોને નિઃશુલ્ક આશરો આપવાની વાત હોય, સોનુ સૂદ હંમેશા મુશ્કેલીના સમયે માનવતાનું ઉત્તમ ઉદાહરણ પૂરું પાડે છે.