દેશભરના લાખો મેડિકલ ઉમેદવારો માટે એક અત્યંત મહત્વપૂર્ણ અને મોટા સમાચાર સામે આવ્યા છે. શિક્ષણ મંત્રાલય સાથે જોડાયેલી અને કોંગ્રેસના વરિષ્ઠ સાંસદ મુકુલ વાસનિકના નેતૃત્વ હેઠળની સંસદીય સમિતિએ રાષ્ટ્રીય પાત્રતા પ્રવેશ પરીક્ષા ને પેન-અને-કાગળ  પદ્ધતિને બદલે કમ્પ્યુટર આધારિત ટેસ્ટ  મોડમાં યોજવાની આકરી ભલામણ કરી છે. JEE Main, UGC NET અને CUET ની તર્જ પર નેશનલ ટેસ્ટિંગ એજન્સીને યુદ્ધના ધોરણે આ ફેરફારો અમલી બનાવવા નિર્દેશ આપવામાં આવ્યા છે. તાજેતરમાં સામે આવેલા વિવાદો અને પેપર લીકની ઘટનાઓ બાદ પરીક્ષાની ગોપનીયતા જાળવી રાખવા માટે આ ક્રાંતિકારી ફેરફાર અત્યંત જરૂરી હોવાનું સમિતિએ ભારપૂર્વક જણાવ્યું છે.

સંસદીય કમિટીએ NTA ને દેશના દરેક જિલ્લામાં ઓછામાં ઓછું એક એમ કુલ ૧,૦૦૦ થી વધુ સરકાર સંચાલિત અને અત્યાધુનિક સુરક્ષા ધરાવતા પરીક્ષા કેન્દ્રો સ્થાપવા ભલામણ કરી છે. ટાયર-૨, ટાયર-૩ શહેરો અને દૂરના ગ્રામીણ વિસ્તારોના વિદ્યાર્થીઓને કોઈ અન્યાય ન થાય તે માટે માળખાકીય સુવિધાઓ પૂર્ણપણે તૈયાર ન થાય ત્યાં સુધી 'હાઇબ્રિડ મોડ' માં પરીક્ષા યોજવાનું સૂચન કરાયું છે. આ ઉપરાંત, આરોગ્ય મંત્રાલય સાથે સંકલન સાધીને NEET-UG પરીક્ષા આપવા માટેની મહત્તમ વય મર્યાદા અને પ્રયાસોની સીમા નક્કી કરવા પણ જણાવાયું છે. કમિટીએ NTA ની અંદર મંજૂર થયેલી ૩૯ જગ્યાઓમાંથી ૨૩ જ ભરેલી હોવા અંગે ચિંતા વ્યક્ત કરી સ્ટાફની ત્વરિત ભરતી કરવા આદેશ આપ્યો છે.

આ સાથે જ સંસદીય સમિતિએ દેશમાં ફૂલીફાલેલા કોચિંગ ઉદ્યોગ અને ગોખણપટ્ટી આધારિત પરીક્ષા પેટર્ન સામે લાલ આંખ કરી છે. રિપોર્ટમાં સ્પષ્ટ નોંધવામાં આવ્યું છે કે વર્તમાન પરીક્ષા પદ્ધતિને કારણે શાળાકીય શિક્ષણ કરતાં ખાનગી કોચિંગ સેન્ટરોનું મહત્વ વધી ગયું છે, જેનાથી આર્થિક રીતે નબળા અને વંચિત વિદ્યાર્થીઓ પાછળ રહી જાય છે. પરીક્ષાની પેટર્નમાં એવા ફેરફારો કરવાનું સૂચન કરાયું છે જેથી માત્ર પેટર્ન ગોખીને આવતા વિદ્યાર્થીઓ રોકાઈ જાય અને વાસ્તવિક જ્ઞાન ધરાવતા પ્રતિભાશાળી વિદ્યાર્થીઓ આગળ આવી શકે. પ્રશ્નપત્રો માત્ર સરકારી સંસ્થાઓના તજજ્ઞો દ્વારા જ તૈયાર કરાવવા અને પરીક્ષાના થોડા દિવસો પહેલા જ તેને આખરી ઓપ આપીને સામેલ નિષ્ણાતોને ગુપ્ત રાખવાની પણ કડક ભલામણ કરવામાં આવી છે.