નવી દિલ્હી, તા.27: દુનિયાભરના દેશો સામે વધી રહેલા દેવા અને મોંઘવારીના ગંભીર પડકારો વચ્ચે ભારત સરકારે દેશના આર્થિક ભવિષ્યને સુરક્ષિત કરવા માટે એક મોટું અને દૂરગામી પગલું ભર્યું છે. કેન્દ્ર સરકારે વર્ષ ૨૦૩૦ સુધીમાં રાષ્ટ્રીય દેવાને ઘટાડીને જીડીપીના ૫૦ ટકા સુધી સીમિત રાખવાનું મહત્વાકાંક્ષી લક્ષ્ય રાખ્યું છે, જેની સત્તાવાર જાહેરાત કેન્દ્રીય નાણાં મંત્રી નિર્મલા સીતારમણ દ્વારા કરવામાં આવી છે.

પ્રાપ્ત વિગતો અનુસાર, વૈશ્વિક સ્તરે પ્રવર્તતી આર્થિક અનિશ્ચિતતાઓ વચ્ચે ભારત સામે ભવિષ્યમાં કોઈ નાણાકીય કટોકટી ઊભી ન થાય તે હેતુસર આ નીતિગત રણનીતિ ઘડવામાં આવી છે. નાણાં મંત્રીએ જણાવ્યું હતું કે રાજકોષીય ખાદ્ય (Fiscal Deficit) પર સતત નિયંત્રણ રાખવાની સરકારની પ્રતિબદ્ધતા દર વર્ષના બજેટમાં સ્પષ્ટપણે જોવા મળે છે અને આંતરરાષ્ટ્રીય સંગઠનોએ પણ ભારતના ઉત્કૃષ્ટ દેવા પ્રબંધનની પ્રશંસા કરી છે.

માથાદીઠ આવક વધારવા અને અર્થતંત્રને વેગ આપવાના પ્રયાસો અંગે વાત કરતા નાણાં મંત્રીએ સ્વીકાર્યું કે કોવિડ-૧૯ મહામારી, વૈશ્વિક યુદ્ધો અને ક્રૂડ ઓઇલના ભાવમાં થતા સતત ઉતાર-ચઢાવે અર્થતંત્ર પર દબાણ વધાર્યું હતું. આમ છતાં, સરકારની સુચારુ નીતિઓને કારણે સામાન્ય જનતા પર આ વૈશ્વિક દબાણની સીધી અસર નહિવત રહી છે અને નાગરિકોની માથાદીઠ આવક વધારવા માટેના પ્રયાસો આગામી સમયમાં પણ પૂરઝડપે ચાલુ રહેશે.

મોંઘવારીના મોરચે સરકારની કામગીરી અંગે પ્રકાશ પાડતા તેમણે જણાવ્યું હતું કે વર્ષ ૨૦૧૪ થી જ દેશમાં ચીજવસ્તુઓના ભાવને સ્થિર રાખવા માટે વિશેષ પગલાં લેવામાં આવ્યા છે. સપ્લાય ચેન એટલે કે પુરવઠા વ્યવસ્થાને અવિરત અને મજબૂત જાળવી રાખવા માટે મંત્રીઓનું એક વિશેષ જૂથ સતત કાર્યરત રહ્યું છે, જેના પરિણામે મોંઘવારીના દરને કાબૂમાં રાખવામાં મોટી સફળતા મળી છે.

આર્થિક નિષ્ણાતોના મતે, વર્ષ ૨૦૩૦ સુધીમાં દેવાનું પ્રમાણ ૫૦ ટકા સુધી લાવવાનો આ લક્ષ્યાંક દેશની મજબૂત નાણાકીય શિસ્ત અને દીર્ઘદ્રષ્ટિ દર્શાવે છે. અગાઉના વર્ષોમાં વૈશ્વિક મંદી અને આર્થિક સુધારાઓના પડકારો હોવા છતાં દેવા પ્રબંધનમાં ભારતે જે કુશળતા દાખવી છે, તેનાથી વૈશ્વિક બજારમાં દેશની શાખ વધુ મજબૂત બની છે.

સરકાર દ્વારા લેવાયેલા આ આર્થિક પગલાંઓથી આગામી સમયમાં દેશનું અર્થતંત્ર વધુ સ્થિર અને આત્મનિર્ભર બનશે. નાણાકીય ખાધ ઘટાડવાની સાથે સાથે જનકલ્યાણની યોજનાઓ અને વિકાસ કાર્યોને સંતુલિત રાખીને આગળ વધવાની આ નીતિ ભારતીય અર્થવ્યવસ્થા માટે અત્યંત લાભદાયી સાબિત થશે.