નવી દિલ્હી: દિલ્હીના રાજકારણમાં લાંબા સમય સુધી ગરમાવો લાવનાર પૂર્વ મુખ્યમંત્રી અરવિંદ કેજરીવાલનો '૬-ફ્લેગસ્ટાફ રોડ' સ્થિત સત્તાવાર બંગલો, જે 'શીશ મહેલ' તરીકે પ્રખ્યાત થયો છે, તે હવે એક સાવ નવા અવતારમાં જોવા મળશે. મુખ્યમંત્રી રેખા ગુપ્તાની સરકારે આ વિવાદિત અને આલીશાન ઇમારતને લઈને એક મોટો યુ-ટર્ન લીધો છે. શરૂઆતમાં આ આખા પરિસરને એક જાહેર મ્યુઝિયમ (સંગ્રહાલય) તરીકે વિકસાવવાની ગણતરી હતી, પરંતુ સરકારે હવે આખી યોજના બદલી નાખી છે. હવે આ ભવ્ય બંગલામાં કોઈ રાજકારણી વસવાટ નહીં કરે, પરંતુ તેને દેશ-વિદેશના અતિ વિશિષ્ટ (VVIP) મહેમાનો માટે એક અત્યાધુનિક અને વૈભવી 'સ્ટેટ ગેસ્ટ હાઉસ' બનાવવામાં આવશે.

દેશની રાજધાની હોવા છતાં દિલ્હી સરકાર પાસે અત્યાર સુધી પોતાનું કોઈ ભવ્ય અને આધુનિક સ્ટેટ ગેસ્ટ હાઉસ નહોતું, જેના કારણે બહારથી આવતા ઉચ્ચ સ્તરીય પ્રતિનિધિમંડળો અને પ્રતિષ્ઠિત મહેમાનોને રોકવા માટે અન્ય વ્યવસ્થાઓ પર નિર્ભર રહેવું પડતું હતું. સરકારનો આ નવો પ્રસ્તાવ આ કમીને હંમેશ માટે દૂર કરશે. જોકે, આ પરિવર્તન દરમિયાન ઇમારતના મૂળ માળખા સાથે કોઈ છેડછાડ કરવામાં આવશે નહીં કે કોઈ મોટું તોડફોડ પણ નહીં થાય. હાલના વૈભવી સેટઅપને જ જાળવી રાખીને તેમાં પ્રશાસનિક અને રહેવાની સુવિધાઓ ગોઠવવામાં આવશે જેથી સરકારી નાણાંનો વ્યય અટકાવી શકાય.

સૌથી મોટો સવાલ એ છે કે શું સામાન્ય જનતા આ 'શીશ મહેલ'ની અંદરનો નજારો જોઈ શકશે? આ અંગે સરકારે સ્પષ્ટ કર્યું છે કે સુરક્ષાના અત્યંત કડક પ્રોટોકોલને કારણે VVIP રહેણાંક વિભાગોમાં સામાન્ય લોકોના પ્રવેશ પર સંપૂર્ણ પ્રતિબંધ રહેશે. જોકે, આ સંકુલને માત્ર રોકાણ પૂરતું મર્યાદિત ન રાખતા કલા અને સંસ્કૃતિના કેન્દ્ર તરીકે પણ ઓળખ અપાશે, જેમાં એક ભવ્ય મલ્ટિપર્પઝ ઓડિટોરિયમ અને કોન્ફરન્સ હોલ બનશે. આ સાંસ્કૃતિક સંકુલમાં યોજાનારા મોટા કલા પ્રદર્શનો, સંગીત સમારોહ અને સાહિત્યિક કાર્યક્રમો દરમિયાન સામાન્ય નાગરિકોને તે નિર્ધારિત ભાગની મુલાકાત લેવાની તક ચોક્કસ મળી શકશે.