ગુજરાતમાં સ્થાનિક સ્વરાજની ચૂંટણીમાં ફરી એકવાર ભાજપને પ્રચંડ જનસમર્થન મળ્યું છે. ત્યારે વડાપ્રધાન નરેન્દ્રભાઈ  મોદીએ પણ ભાજપને મળેલી ભવ્ય જીતને લઈને સોશિયલ મીડિયા પર પોસ્ટ કરતા ઉમેદવારોને અભિનંદન આપ્યા છે. તેમજ ગુજરાતની જનતાનો આભાર વ્યક્ત કર્યો છે.

   પીએમ મોદીએ સોશ્યલ મીડિયા પોસ્ટમાં લખ્યું કે ગુજરાત અને ભારતીય જનતા પાર્ટી વચ્ચેનો સંબંધ હવે વધુ ગાઢ અને અખંડ બન્યો છે! રાજ્યભરમાં યોજાયેલી મહાનગરપાલિકા, નગરપાલિકા, તાલુકા પંચાયત અને જિલ્લા પંચાયતની ચૂંટણીઓમાં ભાજપને મળેલા પ્રચંડ જનસમર્થન અને જનાદેશ બદલ ગુજરાતની જનતાનો હૃદયપૂર્વક આભાર વ્યક્ત કરું છું. રાજ્ય સરકારના પ્રજાલક્ષી અને વિકાસમૂલક કાર્યોને માન્યતા આપતા ગુજરાતના લોકોએ સુશાસનની રાજનીતિ પર ફરી એક વાર વિશ્વાસ વ્યક્ત કર્યો છે. આ પરિણામો સ્પષ્ટ દર્શાવે છે કે વર્ષોથી ભાજપ દ્વારા કરાયેલા અવિરત પરિશ્રમને જનતાએ હાર્દિક આશીર્વાદ આપ્યા છે. હું ગુજરાતની જનતાને ખાતરી આપું છું કે આવનારા સમયમાં અમે વધુ પ્રતિબદ્ધતા અને સમર્પણ સાથે કાર્ય કરી, રાજ્યને વિકાસના નવા શિખરો સુધી પહોંચાડવા માટે સતત પ્રયત્નશીલ રહીશું.