મુંબઈ, તા. 18 જૂન 2026: રિલાયન્સ ઇન્ડસ્ટ્રીઝ લિમિટેડ (RIL) ની 49મી વાર્ષિક સામાન્ય સભા (AGM) માં ચેરમેન મુકેશ અંબાણી અને રિલાયન્સ રિટેલના એક્ઝિક્યુટિવ ડિરેક્ટર ઇશા અંબાણીએ દેશના રિટેલ અને ટેક્સટાઇલ સેક્ટરને બદલી નાખનારી કેટલીક મોટી જાહેરાતો કરી છે. રિલાયન્સ રિટેલ હવે ગાર્મેન્ટ મેન્યુફેક્ચરિંગ (કપડાં ઉત્પાદન) ના ક્ષેત્રમાં ક્રાંતિ લાવવા માટે સંપૂર્ણપણે 'ફ્યુચર-રેડી' પ્લેટફોર્મ તૈયાર કરી રહ્યું છે. આ સિવાય, પીણાંથી લઈને તાજા ફળો અને પોસાય તેવા ઇલેક્ટ્રોનિક્સ સુધીના બિઝનેસને આગળ વધારવા માટે કંપની બે નવા ગ્રોથ પ્લેટફોર્મ ઉમેરવા જઈ રહી છે.
દેશભરમાં 21 મેન્યુફેક્ચરિંગ ક્લસ્ટર અને AJIO ની ધૂમ
મુકેશ અંબાણીએ ગાર્મેન્ટ સેક્ટરના પ્લાન અંગે વિગતો આપતા જણાવ્યું હતું કે, દેશભરમાં 21 પ્રાદેશિક ક્લસ્ટરોમાં સપ્લાયર્સ સાથે મજબૂત ભાગીદારી કરવામાં આવી છે, જ્યાં આ ફ્યુચર-રેડી ગાર્મેન્ટ્સનું મોટા પાયે ઉત્પાદન કરવામાં આવશે. બીજી તરફ, ફેશન પોર્ટલ AJIO એ છેલ્લા પાંચ વર્ષમાં અભૂતપૂર્વ સફળતા મેળવી છે. ઇશા અંબાણીના જણાવ્યા અનુસાર, પાંચ વર્ષમાં AJIO નો બિઝનેસ સાત ગણો વધ્યો છે. ગ્રાહકોનું સરેરાશ બિલ મૂલ્ય 23% વધ્યું છે અને પ્લેટફોર્મ પર કપડાંના વિકલ્પોની સંખ્યા 22% ના વાર્ષિક દરે વધીને 3 મિલિયન (30 લાખ) પર પહોંચી ગઈ છે.
રિલાયન્સ રિટેલની અધધ કમાણી: ₹3.70 લાખ કરોડની રેકોર્ડ આવક
ઈશા અંબાણીએ નાણાકીય વર્ષ 2026 માટે રિલાયન્સ રિટેલનું શાનદાર રિપોર્ટ કાર્ડ રજૂ કર્યું હતું. કંપનીની કુલ આવક 11.8% ના જબરદસ્ત ઉછાળા સાથે ₹3,70,026 કરોડ પર પહોંચી ગઈ છે. આ સમયગાળા દરમિયાન કંપનીનો ટેક્સ પછીનો ચોખ્ખો નફો (PAT) 12% વધીને ₹13,828 કરોડ અને EBITDA 7.9% વધીને ₹27,033 કરોડ થયો છે. રિલાયન્સ રિટેલનો ગ્રાહક આધાર પણ 11% વધીને 387 મિલિયન (38.7 કરોડ) થયો છે, જેમણે વર્ષભરમાં 1.93 અબજના રેકોર્ડબ્રેક વ્યવહારો (ટ્રાન્ઝેક્શન) કર્યા છે. હાલમાં કંપની દેશભરમાં 7.8 કરોડ ચોરસ ફૂટ વિસ્તારમાં 20,000 થી વધુ સ્ટોર્સ ચલાવી રહી છે.
Jio ના લિસ્ટિંગની તૈયારી: અંબાણી પરિવારની નવી પેઢી સંભાળશે કમાન
AGM દરમિયાન મુકેશ અંબાણીએ રોકાણકારો માટે અન્ય એક સૌથી મોટા સમાચાર આપ્યા હતા. Jio પ્લેટફોર્મ્સના બોર્ડે તેના 'ડ્રાફ્ટ રેડ હિયરિંગ પ્રોસ્પેક્ટસ' (DRHP) ને મંજૂરી આપી દીધી છે અને તેને માર્કેટ રેગ્યુલેટર સેબી (SEBI) સમક્ષ રજૂ કરવામાં આવી રહ્યો છે. કંપનીના આ મેગા પબ્લિક લિસ્ટિંગ (IPO) ની સમગ્ર પ્રક્રિયાનું નેતૃત્વ મુકેશ અંબાણીના ત્રણેય સંતાનો - આકાશ અંબાણી, અનંત અંબાણી અને ઇશા અંબાણી કરી રહ્યા છે, જેઓ ભવિષ્યમાં રિલાયન્સ ગ્રુપ માટે નેક્સ્ટ જનરેશન વેલ્યુ ક્રિએશનનું નેતૃત્વ કરશે.