નવી દિલ્હી : યુનિફાઇડ પેમેન્ટ્સ ઇન્ટરફેસ (UPI) વાપર્તા કરોડો ભારતીયો માટે એક અત્યંત રાહતજનક સમાચાર સામે આવ્યા છે. નેશનલ પેમેન્ટ્સ કોર્પોરેશન ઓફ ઇન્ડિયા (NPCI) દ્વારા કરવામાં આવેલી સ્પષ્ટતા મુજબ, પ્રસ્તાવિત મર્ચન્ટ ડિસ્કાઉન્ટ રેટ (MDR) ચાર્જીસની અસર UPI ના કુલ ટ્રાન્ઝેક્શન મૂલ્યના માત્ર ૧૦ ટકા હિસ્સા પર જ પડશે. જેનો અર્થ એ થાય છે કે ૯૦ ટકા જેટલા મોટાભાગના સામાન્ય વ્યવહારો પર કોઈ પણ પ્રકારની વધારાની ફી કે ચાર્જ ચૂકવવો પડશે નહીં.

હાલમાં ચર્ચામાં આવેલા MDR ચાર્જીસ અંગે સ્પષ્ટતા કરતાં NPCI એ જણાવ્યું હતું કે આ પ્રસ્તાવિત ચાર્જીસનો મોટો આર્થિક બોજ સામાન્ય ગ્રાહકો કે નાના વેપારીઓ પર નાખવામાં આવશે નહીં. તેના બદલે મોટા બિલ ચૂકવતા કોર્પોરેટ્સ અને સંસ્થાઓ જ આ ફીનો મહત્તમ હિસ્સો ભોગવશે. જેના કારણે સામાન્ય દૈનિક જરૂરિયાતો માટે શાકભાજી, કરિયાણું કે નાની-મોટી ખરીદી કરતા રૂટીન UPI યુઝર્સને ચાર્જીસમાંથી સંપૂર્ણ મુક્તિ મળતી રહેશે.

નોંધનીય છે કે ડિજિટલ ઇન્ડિયા મિશન હેઠળ UPI ની લોકપ્રિયતા દેશના ખૂણે-ખૂણે પહોંચી ગઈ છે. આ સંજોગોમાં ચાર્જીસ લાગવાની અફવાઓથી ગ્રાહકોમાં ચિંતાનો માહોલ સર્જાયો હતો. પરંતુ NPCI ની આ જાહેરાત બાદ સ્પષ્ટ થઈ ગયું છે કે નાના વેપારીઓ અને ગ્રાહકો માટે UPI વ્યવહાર અગાઉની જેમ જ સુગમ અને મફત રહેશે. આ નિર્ણયથી દેશમાં ડિજિટલ પેમેન્ટ્સની ગતિ જળવાઈ રહેશે.